Agjencia e Statistikave të Kosovës ka publikuar “Nivelin e Pagave në Kosovë” për vitin 2021, ku vërehet se në sektorin publik kishte një rënie të pagës bruto dhe neto, krahasuar me vitin 2020, që ka ardhur për arsye se në vitin paraardhës ka pasur përfitime të shtesave në sektorët specifikë. Te të dhënat e sektorit privat nuk janë të përfshira shtesat në pagën mujore, sepse ato përfshihen në deklaratën vjetore si qarkullim.
Në vitin 2021, pagat mesatare bruto në Kosovë ishin 484 Euro, ndërsa në vitin 2020 ishin 466 Euro. Pra, kishte një rritje prej 18 Eurosh nga viti paraardhës. Kurse, paga neto, në vitin 2021 ishte 432 Euro, krahasuar me vitin 2020 që ishte 416 Euro, një rritje prej 16 Eurosh.
Paga mesatare bruto në sektorin publik në vitin 2021 ishte 612 Euro, ndërsa, paga mesatare neto 542 Euro. Paga mesatare bruto në sektorin privat, në vitin 2021 ishte 419 Euro, ndërsa në vitin 2020 ishte 380 Euro. Pra, kishte një rritje prej 39 Eurosh. Paga mesatare neto në vitin 2021 ishte 376 Euro, krahasuar me vitin 2020 e cila ishte 342 euro. Pra, një rritje prej 34 Eurosh.
Niveli i pagave më të larta në Kosovë ishte në sektorin e ndërmarrjeve publike dhe paga më e ulët në sektorin privat. Paga mesatare bruto në vitin 2021, sipas aktiviteteve ekonomike, më a larta ishte te: Furnizimi me energji elektrike, gaz, avull dhe ajër të kondicionuar (949 Euro); dhe Informim dhe komunikimi (757 Euro). Paga më e ulët ishte te akomodimi dhe aktivitetet e shërbimeve me ushqim (281 Euro).
Përsa i përket normës së pagës minimale, ajo zakonisht është e rregulluar përmes ligjeve shtetërore. Në Kosovë, aktualisht paga minimale është e kategorizuar në 130 Euro për të punësuarit deri në moshën 35-vjeçare dhe 170 Euro për të punësuarit mbi moshën 35-vjeçare.
