Kredia në monedhën evropiane ka shënuar rritje në muajt e parë të këtij viti.
Banka e Shqipërisë bën të ditur se, në 4-muajt e fundit sektori bankar dha 365 milionë euro kredi të reja.
Krahasuar me të njëjtën periudhë të vitit të kaluar, kredia e re në euro është rritur me 57%, rritje kjo më e lartë se rritja mesatare prej 37% e kredisë së re në total, për të njëjtën periudhë.
Sipas statistikave të Bankës së Shqipërisë, në fund të muajit prill pesha e portofolit të kredisë në euro ndaj kredisë për ekonominë arriti në 46.5%, ndërsa një vit më parë përbënte rreth 45.5%.
Ekspertët shprehen se, pasiguria e lidhur me lëvizjen e normave të interesit ka nxitur bankat të investojnë më shumë prej fondeve të lira në euro për të dhënë kredi brenda vendit. Por faktor tjetër, sipas tyre është edhe rritja e çmimeve të importit.
Një pjesë e mirë e bizneseve importuese marrin kredi direkt në monedhën Europiane për të mbuluar nevojat për blerje mallrash jashtë vendit.
