Norma e inflacionit arriti një nivel historik, 7.4 % në muajin qershor. Kjo pasi invazioni rus në Ukrainë, por edhe kriza energjetike në tregjet botërore ka përshpejtuar rritjen e çmimeve.
INSTAT publikoi sot Indeksin e Çmimeve të Konsumit (IÇK), në muajin qershor 2022.
Sipas INSTAT, ndryshimi vjetor i indeksit të çmimeve të konsumit në muajin qershor 2022 është 7,4 %, një vit më pare ky ndryshim ishte 1,6 %.
Ndryshimi mujor i indeksit të çmimeve të konsumit në muajin qershor 2022, krahasuar me maj 2022 është -0,1 %.
Referuar INSTAT-it, rritja vjetore e çmimeve në muajin qershor është ndikuar kryesisht nga grupi “ushqime dhe pije joalkoolike” me 4,38 %, pasuar nga grupi “transporti” me 1,53 %.
Çmimet e grupit “qira, ujë, lëndë djegëse dhe energji” dhënë ndikim me 0,54 %, ndërsa çmimet e grupit “mobilje, pajisje shtëpie dhe mirëmbajtje e shtëpisë” me 0,28 %.
INSTAT bën të ditur se çmimet e grupit “hotele, kafene dhe restorante” kanë kontribuar me 0,25 %, ndërsa çmimet e grupit “pije alkoolike dhe duhan” me 0,23 %.
Çmimet e grupit “veshje dhe këpucë” kontribuuan me 0,07 %, ndërsa çmimet e grupit “shëndeti” me 0,01 %.
Krahasuar me muajin qershor 2021, rritja më e madhe e çmimeve vërehet në grupin “transporti” me 26.9 %, pasuar nga grupet “ushqime dhe pije joalkoolike” me 12.6 %, “hotele, kafene dhe restorante” me 5.6 %, “pije alkoolike dhe duhan” me 4.7 %, “mobilje, pajisje shtëpie dhe mirëmbajtje e shtëpisë” me 3.8 %, “qira, ujë, lëndë djegëse dhe energji” me 2.8 %, “veshje dhe këpucë” me 1.6 %, “mallra dhe shërbime të ndryshme” me 1 %, “komunikimi” dhe “shërbimi arsimor” me 0.6 % secili dhe “shëndeti” me 0.3 %.
Nga ana tjetër, grupi “argëtim dhe kulturë” u ul me 0.9 %. Brenda grupit të ushqimeve çmimet e nëngrupit “vajra dhe yndyrna” u rritën me me 30.3 %, pasuar nga nëngrupet “bukë dhe drithra” me 19.1 %, “qumësht, djathë dhe vezë” me 18.5 %, “sheqer, recel, mjaltë, çokollata dhe mbëlsira” me 14.3 %, “zarzavate përfshirë patatet” me 10.3 %, “mish” me 9 %, “peshk” 8.6 %, etj.
