Nafta po qëndron në rritje edhe në sesionin e sotëm për të tretën ditë me radhë, pasi prodhuesit më të mëdhenj, si Arabia Saudite dhe Emiratet e Bashkuara Arabe e kanë të pamundur në rrisin prodhimin në mënyrë domethënëse, ndërsa trazirat në Libi dhe Ekuador kanë shtuar shqetësimet mbi furnizimin e tregut.
Nafta Bruto amerikane po tregtohet në rreth 110 dollarë për fuçi, ndërsa nafta Brent e Londrës po tregtohet në rreth 116 dollarë për fuçi. Emiratet e Bashkuara dhe Arabia Saudite ishin parë si dy vendet e vetme të OPEC, që kanë kapacitete për të rritur prodhimin dhe të zëvëndësojnë naftën e munguar nga Rusia.
Por, ministri i energjisë në Emiratet e Bashkuara Arabe, deklaroi se vendi i tij po prodhon pranë kapaciteteve maksimale, bazuar në kuotën e 3.1 milionë fuçive në ditë, sipas marrëveshjes së arritur mes OPEC dhe aleatëve, që ndryshe njihen si OPEC+.
Në anën tjetër, Arabia Saudite mund ta rrisë prodhimin edhe me 150 mijë fuçi në ditë, një shifër e pamjaftueshme për të plotësuar kërkesën në rritje. Kjo çështje u diskutua edhe në samitin e G7-ës, dhe u konfirmua nga presidenti i Francës, Emmanuel Macron, i cili tha se nevojitet të gjenden tregje alternative.
Liderët e G7-ës po diskutojnë edhe vendosjen e një kufiri të mundshëm ndaj çmimit të naftës ruse, që do të dëmtonte financimin e luftës nga presidenti Vladimir Putin dhe do të ulte çmimet e energjisë.
