Apple e kaloi Nvidia të premten, duke u bërë kompania me vlerën më të madhe në botë. Ky ndryshim riorganizon renditjen e gjigantëve të teknologjisë, ndërsa investitorët po rivlerësojnë perspektivën e inteligjencës artificiale (IA).
Vlera e tregut e Apple ishte rreth 4.88 trilionë dollarë, ndërsa aksionet e saj mbetën pothuajse të pandryshuara. Ndërkohë, vlera e Nvidia ra në rreth 4.86 trilionë dollarë, pas një rënieje prej 3.5% të aksioneve.
Ky ndryshim tregon se investitorët nuk po përqendrohen më vetëm te përfituesit më të dukshëm të bumit të inteligjencës artificiale, si Nvidia, e cila kishte mbajtur vendin e parë për gati një vit. Apple rikthehet në krye për herë të parë që nga prilli i vitit të kaluar.
“Apple shihej si e vonuar në garën e inteligjencës artificiale, sepse nuk po shpenzonte shumë për zhvillimin e modeleve të IA-së, por tani perceptimi ka ndryshuar,” tha Toni Meadows, drejtuese e investimeve në BRI Wealth Management.
“Apple është më pak e ekspozuar ndaj kostove të larta të investimeve kapitale dhe është më e pozicionuar për të fituar nga inteligjenca artificiale përmes shërbimeve, ekosistemit të saj të mbyllur dhe përmirësimeve të pajisjeve. Rritja e vlerësimit të kompanisë pasqyron besimin në qëndrueshmërinë e fitimeve, dhe jo vetëm pritshmëri spekulative për IA-në.”
Për një kompani që shpesh konsiderohej se kishte mbetur pas në garën e inteligjencës artificiale, ky moment tregon përpjekjet e Apple për t’u pozicionuar më fort mes liderëve të sektorit dhe mund të ndikojë në mënyrën se si do të vlerësohen muajt e fundit të Tim Cook si drejtor i përgjithshëm.
Cook po përgatitet t’ia dorëzojë drejtimin e kompanisë në shtator veteranit të sektorit të pajisjeve, John Ternus.
Muajin e kaluar, Apple prezantoi një version tërësisht të përmirësuar të Siri, të vonuar prej kohësh, duke shpresuar se asistenti i ri do ta ndihmojë kompaninë të ngushtojë diferencën me rivalët e mëdhenj të teknologjisë dhe startup-et që po udhëheqin garën në inteligjencën artificiale.
Disa analistë besojnë se Apple zotëron një “minierë ari” për inteligjencën artificiale falë të dhënave personale që ruhen në çdo iPhone. Këto të dhëna mund ta bëjnë Siri-n më të dobishme dhe më të aftë për t’u përgjigjur përdoruesve.
Sfida është se këto të dhëna mbrohen nga sistemet operative për arsye privatësie, ndaj Apple duhet të gjejë një mënyrë për t’i shfrytëzuar pa cenuar privatësinë e përdoruesve.
Shpenzimet për inteligjencën artificiale po nxjerrin fitues të rinj
Nvidia u bë kompania e parë në botë që kaloi një vlerë tregu prej 5 trilionë dollarësh në tetor, duke hyrë në një kategori të rrallë shumë përpara rivalëve të saj.
Megjithatë, fakti që tani është tejkaluar nga Apple nuk do të thotë domosdoshmërisht se ky ndryshim do të jetë i përhershëm. Nvidia vazhdon të jetë një nga përfitueset kryesore të investimeve në inteligjencën artificiale dhe procesorët e saj grafikë mbeten baza e shumë aplikacioneve të inteligjencës artificiale gjeneruese.
Po ashtu, Nvidia mund ta rimarrë vendin e parë nëse ndryshon sërish qëndrimi i investitorëve.
Nga ana tjetër, edhe Apple përballet me sfida, pasi ka rritur çmimet për të përballuar kostot në rritje, një strategji që mund të ndikojë negativisht në kërkesën e konsumatorëve.
“Nuk shoh ndonjë dallim thelbësor. Nvidia ka shumë gjasa të mbetet një nga kompanitë më të rëndësishme në zhvillimet e ardhshme,” tha Benjamin Hall, zëvendëspresident për kërkime investimesh në Segal Marco Advisors.
Entuziazmi për inteligjencën artificiale është përhapur edhe në sektorë të tjerë të industrisë së gjysmëpërçuesve. Fituesit më të mëdhenj të këtij viti kanë qenë prodhuesit e çipave të memories, si Micron, e cila kaloi vlerën e 1 trilion dollarëve në muajin maj, pasi investitorët kuptuan rëndësinë e çipave të memories për infrastrukturën e inteligjencës artificiale.
Edhe kompania SK Hynix nga Koreja e Jugut u listua në bursën Nasdaq më herët gjatë këtij muaji, duke shtuar një tjetër konkurrent në garën për vëmendjen e investitorëve.
“Pjesëmarrësit e rinj në treg mund ta shpërndajnë interesin e investitorëve përtej grupit të njohur të kompanive ‘Magnificent Seven’, duke e zgjeruar fokusin edhe te kompani të tjera,” tha Hall.
Megjithatë, rritja e jashtëzakonshme e aksioneve të kompanive të çipave hasi vështirësi në korrik, kur investitorët filluan të dyshojnë për qëndrueshmërinë afatgjatë të bumit të inteligjencës artificiale. Si rezultat, Indeksi i Gjysmëpërçuesve të Filadelfias ra me pothuajse 19% nga niveli i tij rekord.
Pavarësisht kësaj rënieje të ndjeshme, indeksi vazhdon të ketë performancë më të mirë se Nvidia gjatë këtij viti./Përshtati nga Reuters, ekofin.al
