Punësimet sezonale gjatë verës krijuan 486 mijë vende pune në tremujorin e dytë, duke e çuar numrin e të punësuarve në një rekord prej 22.8 milionë personash.
Norma e papunësisë në Spanjë ra në 9.87% në tremujorin e dytë të vitit, niveli më i ulët që prej vitit 2008.
Sipas Institutit Kombëtar të Statistikave të Spanjës, INE, numri i të punësuarve arriti në 22.779 milionë, pasi mes muajve prill dhe qershor u krijuan 486 mijë vende të reja pune. Në të njëjtën kohë, numri i të papunëve u ul me 213,300 persona, duke e çuar normën e papunësisë nën kufirin 10%.
Rritja e punësimit përkoi me nisjen e sezonit veror, një periudhë tradicionalisht e favorshme për punësime, veçanërisht në sektorin e shërbimeve. Edhe forca e punës u zgjerua gjatë tremujorit, me 272,700 persona, duke arritur në nivelin rekord prej 25.27 milionësh. Kjo pasqyron si rritjen e punësimit, ashtu edhe shtimin e personave që kërkojnë të hyjnë në tregun e punës.
Sektori i shërbimeve përqendroi pjesën më të madhe të vendeve të reja të punës, i mbështetur nga aktiviteti turistik. Rritje u shënua gjithashtu në ndërtim dhe industri, ndërsa bujqësia ishte i vetmi sektor që humbi vende pune gjatë kësaj periudhe.
Katalonja regjistroi rritjen më të madhe të punësimit në terma absolutë, ndërsa Ishujt Balearikë shënuan rritjen më të fortë në përqindje.
Zgjerimi i punësimit u përqendrua te puna me pagë dhe me kohë të plotë. Pothuajse tre të katërtat e të punësuarve kanë tashmë kontrata të përhershme, ndërsa punësimi i përkohshëm vijoi të tkurret, veçanërisht në sektorin privat. Nga 486 mijë vendet e reja të punës, 405,400 ishin pozicione me kohë të plotë.
Punësimi në sektorin privat u rrit me 501,600 persona gjatë tremujorit, ndërsa në sektorin publik ra me 15,600. Sipas të dhënave të rregulluara sezonalisht, punësimi u rrit me 0.54% krahasuar me tremujorin paraardhës.
Me këto rezultate, Spanja ndodhet vetëm 221 mijë vende pune larg objektivit të qeverisë për të arritur në 23 milionë të punësuar deri në fund të vitit 2026. Ministri i Ekonomisë, Carlos Cuerpo, e paraqiti këtë objektiv në shkurt 2025, duke u bazuar në një rritje të pritshme të punësimit me rreth 500 mijë persona në vit./Përshtati nga Euronews, ekofin.al
