Aleanca e Profesionistëve të Lirë (APL) ka reaguar sot përmes një deklarate zyrtare në lidhje me vështirësitë që po hasin bizneset në dorëzimin e pasqyrave financiare, ndërsa afron data 31 korrik, që është edhe afati i fundit ligjor për depozitimin e tyre (pas kësaj date aplikohet gjobë prej 60,000 lekësh).
APL vëren se depozitimi i pasqyrave financiare dhe dokumentave të tjera në mënyrë digjitale, përmes sistemit qendror e-Albania, përfaqëson një hap të rëndësishëm drejt modernizimit të shërbimeve dhe krijimit të lehtësirave për profesionistët dhe bizneset.
Por siç vërejnë profesionisët e lirë, sidomos gjatë muajit korrik, janë shfaqur shumë vështirësi teknike që kanë ndikuar në përmbushjen e afateve ligjore dhe kanë krijuar pasiguri te përdoruesit profesionistë, si kontabilistët, audituesit dhe sipërmarrësit.
Ndër sfidat e konstatuara, APL veçon:
- Ngarkesën e lartë të sistemit dhe ndërprerjet e papritura në momente kyçe të ngarkimit të dokumentacionit financiar;
- Probleme me nënshkrimin elektronik, edhe kur pajisjet dhe certifikatat janë funksionale;
- Mungesë informacioni zyrtar në lidhje me shkakun e vonesave dhe kohën e rikuperimit të plotë të funksionalitetit;
- Rrezikun e penaliteteve automatike për subjektet, pavarësisht se vonesat kanë ardhur për shkak të vështirësive teknike të platformës.
Nisur nga problematikat, Alenca e Profesionistëve të Lirë kërkon një komunikim më të qartë dhe të përditësuar nga institucionet përgjegjëse mbi problematikat dhe afatet e rikthimit në funksion të plotë të platformës; marrjen në konsideratë të një shtyrje të afatit ligjor për dorëzimin e pasqyrave financiare me të paktën 7 ditë kalendarike, pa penalitete për përdoruesit që nuk kanë mundur të dorëzojnë dokumentacionin për shkak të vështirësive teknike; si edhe krijimin e një kanali të dedikuar për raportimin dhe menaxhimin e ankesave teknike, me përgjigje të shpejta dhe njohje të provave dixhitale.
