Universiteti i Harvardit ka paditur administratën e Trump pasi presidenti i SHBA-ve i hoqi universitetit të drejtën për të regjistruar studentë ndërkombëtarë, duke përshkallëzuar në këtë mënyrë konfliktin midis Shtëpisë së Bardhë dhe një prej institucioneve më prestigjioze të Amerikës.
Në padinë e ngritur në Boston, universiteti i quajti veprimet e administratës një “shkelje flagrante” të ligjit.
Kjo vjen një ditë pasi zyrtarët në Departamentin e Sigurisë Kombëtare thanë se do t’i anulonin Universitetit të Harvardit aksesin në programet e vizave studentore, raporton BBC.
“Ne dënojmë këtë veprim të paligjshëm dhe të pajustifikuar”, tha Presidenti i Harvardit, Alan Garber, në një letër
Kujtojmë se ditën e djeshme qeveria e presidentit amerikan Donald Trump tërhoqi mundësinë e Universitetit të Harvardit për të regjistruar studentë ndërkombëtarë.
Ministrja e Sigurisë së Brendshme, Kristi Noem, urdhëroi që të ndërpritet certifikimi i Universitetit të Harvardit në programin e shkëmbimit të studentëve (Student and Exchange Visitor Program), thuhet në deklaratën e departamentit.
Ky veprim do të thotë se Harvard nuk mund të regjistrojë më studentë ndërkombëtarë dhe studentët e huaj ekzistues duhet ose të transferohen në një institucion tjetër ose do të humbin statusin e tyre të ligjshëm, theksohet në deklaratë.
“Kjo administratë po e mban Harvardin përgjegjës për promovimin e dhunës, antisemitizmit dhe bashkëpunimin me Partinë Komuniste Kineze në kampusin e tij,” deklaroi Noem. “Është një privilegj, jo një e drejtë, që universitetet të regjistrojnë studentë të huaj dhe të përfitojnë nga tarifat më të larta të shkollimit që ata paguajnë për të shtuar fondet e tyre prej miliarda dollarësh.”
