Uashingtoni dhe Parisi po përballen me tensione të reja tregtare, ndërsa presidenti amerikan ka vënë në shënjestër taksën franceze ndaj kompanive të mëdha teknologjike, përpara samitit të G7-s.
Eksportet franceze të verës dhe shampanjës rrezikojnë sërish të bëhen “dëm anësor” në një mosmarrëveshje mes Uashingtonit dhe Parisit, ndërsa Trump rikthen një kërcënim që e ka përdorur disa herë ndaj Francës.
Sipas një raportimi të hënën nga New York Post, presidenti amerikan Donald Trump ka kërcënuar të vendosë tarifë 100% ndaj verës dhe shampanjës franceze, nëse Franca nuk heq taksën e saj për shërbimet digjitale ndaj kompanive teknologjike.
Franca e prezantoi këtë taksë në vitin 2019, duke aplikuar një taksë prej 3% mbi të ardhurat e gjeneruara brenda vendit nga kompanitë e mëdha teknologjike, përfshirë Facebook, Amazon, Apple dhe kompaninë mëmë të Google, Alphabet.
Presidenti francez Emmanuel Macron pritet të presë Trumpin të hënën, përpara samitit të G7-s në Evian, në brigjet e Liqenit të Gjenevës.
Trump tha se i kishte kërkuar Macronit “të mos taksojë kompanitë amerikane”, sipas gazetës.
“Nëse e bëjnë, nuk kam zgjidhje tjetër veçse të vendos një tarifë 100% mbi të gjitha shampanjat dhe të gjitha verërat që vijnë nga Franca”, citohet të ketë thënë presidenti republikan.
“Gjithçka që Macron duhet të bëjë është të heqë taksën mbi shitjet dhe nuk do të kishte këtë lloj presioni.”
Shtetet e Bashkuara janë tregu më i madh i eksportit për verërat dhe pijet alkoolike franceze, duke përbërë 21% të totalit të eksporteve vitin e kaluar, sipas Federatës Franceze të Eksportuesve të Verës dhe Pijeve Alkoolike.
Verërat franceze dhe evropiane të eksportuara në SHBA tashmë përballen me një tarifë 15%, nga 10% që ishte më parë.
Eksportet e verërave dhe pijeve alkoolike franceze drejt Shteteve të Bashkuara ranë me 21% vitin e kaluar, sipas federatës.
Në janar, Trump kërcënoi të vendoste tarifa 200% ndaj verës franceze, pasi Franca sinjalizoi se do të refuzonte ftesën për t’iu bashkuar “Bordit të Paqes” të propozuar prej tij, që synonte zgjidhjen e konflikteve ndërkombëtare.
Kanadaja e hoqi vitin e kaluar taksën e saj për shërbimet digjitale, në përpjekje për të ruajtur negociatat tregtare me Shtetet e Bashkuara, pas presionit nga Trump.
Mbështetësit e taksave për shërbimet digjitale argumentojnë se ato ndihmojnë që kompanitë e mëdha teknologjike të paguajnë taksa aty ku gjenerojnë të ardhura dhe kundërshtojnë strategjitë agresive të optimizimit fiskal.
Gjatë mandatit të tij të parë, Trump kishte kërcënuar gjithashtu me tarifa ndaj shampanjës dhe djathit francez, pasi Franca prezantoi taksën për shërbimet digjitale në vitin 2019./Përshtati nga Euronews, ekofin.al
