Një rekord prej 45% e menaxherëve të rezervave të anketuar nga Këshilli Botëror i Arit (WGC) presin të rrisin rezervat e arit të institucioneve të tyre gjatë 12 muajve të ardhshëm, me një rritje prej 2 pikë përqindjeje krahasuar me një vit më parë, bëri të ditur të martën organizata ndërkombëtare.
Shumica e të anketuarve, 54% e 74 bankave qendrore që iu përgjigjën anketës vjetore të WGC-së, të zhvilluar nga 5 shkurti deri më 19 maj, thanë se zotërimet e tyre do të mbeten të pandryshuara, ndërsa 1% parashikuan rënie.
Pjesa më e madhe e përgjigjeve u mor pas nisjes së konfliktit në Lindjen e Mesme në fund të shkurtit, i cili shkaktoi rritje të çmimeve të naftës dhe uli çmimet e arit.
Bankat qendrore mbeten të interesuara për arin dhe rënia e fundit e çmimit nuk ua ka ndryshuar qëndrimin, tha Shaokai Fan, drejtues i sektorit të bankave qendrore në WGC.
Shtetet e Bashkuara dhe Irani ranë dakord gjatë fundjavës për kushtet për t’i dhënë fund luftës dhe për të rihapur Ngushticën e Hormuzit, çka nxiti një rritje prej 3% të çmimeve të arit të hënën.
Sipas konsulencës Metals Focus, kërkesa për ar nga bankat qendrore do të ngadalësohet me 15% me bazë vjetore në vitin 2026, në terma sasiorë, por do të mbetet mbi nivelet e para vitit 2022, duke vijuar të jetë një faktor mbështetës për tregun.
WGC bëri të ditur se 93% e të anketuarve raportuan se tashmë mbajnë ar në rezervat e tyre, nga 81% një vit më parë.
Ndër arsyet kryesore për mbajtjen e arit, një rekord prej 90% e të anketuarve përmendën performancën e tij gjatë periudhave të krizës. Ndër përgjigjet kryesore ishin gjithashtu ruajtja afatgjatë e vlerës dhe diversifikimi i portofolit. Roli i arit si mbrojtje ndaj rrezikut gjeopolitik u favorizua veçanërisht nga të anketuarit në ekonomitë në zhvillim dhe tregjet emergjente, me 85%.
Ndërsa disa banka qendrore vijuan të zhvendosin arin e tyre, 9% e të anketuarve thanë se kishin rritur ruajtjen e tij brenda vendit gjatë 12 muajve të fundit, nga 5% një vit më parë. Ndërkohë, 10% thanë se kishin diversifikuar vendndodhjet e ruajtjes së arit jashtë vendit, nga 2% më parë.
Brenda 12 muajve, 7% planifikojnë të rrisin ruajtjen e arit brenda vendit, ndërsa 9% planifikojnë të diversifikojnë vendndodhjet jashtë vendit.
WGC nuk u kërkoi bankave qendrore të specifikonin se nga vinte ari i tyre në rastet e riatdhesimit.
Megjithatë, kërkimi i saj tregoi se Banka e Anglisë mbetet vendndodhja më e preferuar për ruajtjen e arit, e ndjekur nga ruajtja brenda vendit dhe Banka për Shlyerjet Ndërkombëtare./Përshtati nga Reuters, ekofin.al
