Banka e Shqipërisë bën të ditur se, niveli i kapitalizimit të sektorit bankar rezultoi i qëndrueshëm në 3-mujorin e parë të vitit 2022.
Sipas të dhënave të publikuara sot nga Banka Qendrore, ky tregues shënoi 17.94 % kundrejt nivelit 12 % të përcaktuar nga BSH-ja.
Raporti i mjaftueshmërisë së kapitalit këtë tremujor është ndikuar kryesisht nga zgjerimi i investimeve dhe sidomos nga rritja e huadhënies për sektorin privat.
Vlera e kapitalit rregullator të sistemit u rrit gjatë këtij 3-mujori në rreth 170 miliardë lekë, 1.7 % më shumë që nga fillimi i vitit dhe 9.1 % më shumë krahasuar me të njëjtën periudhë të vitit 2021.
Kapitali rregullator i sektorit bankar shqiptar përfshin instrumentet: kapitalin e paguar aksioner, primet e aksioneve, rezervat dhe fitimet e pashpërndara.
