Të ardhurat nga puna jashtë vendit përbëjnë një komponent të rëndësishëm për ekonomitë e shumë vendeve. Emigrimi për qëllime punësimi është shndërruar në një fenomen të zakonshëm, i nxitur nga kërkimi për paga më konkurruese dhe kushte më të mira pune.
Por si kanë evoluar këto të ardhura gjatë pesë viteve të fundit? Sipas metodologjisë së “Bilancit të Pagesave”, të ardhurat nga puna jashtë vendit klasifikohen si kompensimi i punonjësve që përfshin pagat, shpërblimet dhe përfitime të tjera që marrin individët që punojnë përkohësisht jashtë vendit të tyre, për punën e bërë për një punëdhënës të huaj. Pjesë e kësaj kategorie janë kryesisht punonjësit sezonalë, ata që punësohen për periudha afatshkurtra (më pak se një vit), si dhe punëtorët kufitarë, të cilët ruajnë qendrën e interesit ekonomik në vendin e tyre të origjinës.
Të dhënat e “Bankës së Shqipërisë” tregojnë se të ardhurat nga puna jashtë vendit kanë ndjekur një trend rritës pas pandemisë globale. Gjatë 9-mujorit të vitit 2020, këto të ardhura arritën në 155 milionë euro. Në vitin 2021, ato shënuan një rritje të ndjeshme, duke arritur në 199 milionë euro për të ndjekur më tej të njëjtin trend në vitet 2022 dhe 2023, ku vlerat e tyre respektive ishin 311 dhe 389 milionë euro. Gjatë 9-mujorit të vitit 2024, të ardhurat nga puna jashtë vendit arritën në 488 milionë euro. Në terma neto, duke zbritur të ardhurat e jorezidentëve nga puna në Shqipëri, këto të ardhura u vlerësuan me 458 milionë euro, çka përfaqëson një rritje prej rreth 18% krahasuar me të njëjtën periudhë të vitit 2023.
Në analizat e flukseve hyrëse të fondeve nga jashtë, të ardhurat nga puna jashtë vendit shpesh trajtohen së bashku me remitancat e emigrantëve. Për 9-mujorin e vitit 2024, dërgesat e emigrantëve u vlerësuan në 772 milionë euro. Duke mbledhur remitancat dhe të ardhurat nga puna jashtë vendit, kontributi total i këtyre fondeve në ekonominë shqiptare arriti në 1.23 miliardë euro për periudhën Janar-Shtator 2024./Scan
