Ministri i Financave Petrit Malaj ka nënshkruar sot në Paris “Konventën Shumëpalëshe për Lehtësimin e Zbatimit të Shtyllës së Dytë Subjekt i Rregullit Tatimor”. Malaj firmosi në emër të Shqipërisë ndërsa në emër të OECD nënshkroi Zëvendëssekretarja e Përgjithshme e Organizatës për Bashkëpunim dhe Zhvillim Ekonomik. Fabrizia Lapecorella.
Nënshkrimi i kësaj Konvente është pjesë e masave, në kuadër të projektit ndërkombëtar BEPS, pjesë e të cilës Shqipëria është që prej vitit 2019.
Rregulli i Tatimit Minimal të Shtyllës Dy (The Pillar Two Subject to Tax Rule/STTR) është një dispozitë e bazuar në traktat, që zbatohet mbi një grup të përcaktuar pagesash brenda grupit ndërkufitar. Kur këto pagesa tatohen me një normë të tatimit mbi fitimin më të ulët se 9% në vendin e rezidencës së përfituesit, atëherë vendi i burimit ka të drejtë të tatojë këto të ardhura deri në atë nivel minimal.
STTR është një pjesë integrale e konsensusit të arritur mbi rregullat globale kundër erozionit të bazës tatimore, që synojnë të adresojnë sfidat tatimore që rrjedhin nga digjitalizimi i ekonomisë.
Gjatë fjalës së tij, Ministri i Financave u shpreh se Shqipëria do të mund të përmbushë me efikasitet më të lartë angazhimet e saj, duke qenë se qëllimi kryesor i Konventës është të ndihmojë në rritjen e transparencën dhe integritetit të sistemit ndërkombëtar të tatimeve.
