Bashkëpunimi rajonal në sektorin e komunikimeve elektronike po merr një dimension gjithnjë e më konkret, me fokus të qartë tek zhvillimi i infrastrukturave moderne si rrjetet me fibër optike dhe teknologjia 5G. Kjo ishte në qendër të takimit të zhvilluar në Tiranë mes Autoritetit të Komunikimeve Elektronike dhe Postare (AKEP) dhe Agjencisë për Komunikime Elektronike të Maqedonisë së Veriut (AEK), ku palët theksuan se investimet në këto teknologji janë thelbësore për rritjen ekonomike dhe integrimin rajonal.
Delegacioni i AEK, i kryesuar nga drejtori Jeton Akiku dhe kryetari i Komisionit Prof. Dr. Orce Simov, u prit nga kryetari i AKEP, Gentian Sala, së bashku me drejtuesit kryesorë të institucionit. Në fokus të diskutimeve ishte nevoja për përshpejtimin e zhvillimit të rrjeteve me fibër optike, të cilat konsiderohen si baza kryesore për një ekonomi digjitale funksionale dhe konkurruese.
Palët nënvizuan se shtrirja e infrastrukturës me fibër optike është një kusht i domosdoshëm për rritjen e cilësisë së shërbimeve të internetit dhe për përballimin e kërkesës në rritje për kapacitete të larta transmetimi. Në këtë kuadër, u theksua rëndësia e politikave rregullatore që nxisin investimet private dhe sigurojnë akses të barabartë në rrjet për operatorët.
Një tjetër shtyllë kyçe e diskutimit ishte zhvillimi i teknologjisë 5G, e cila pritet të transformojë sektorë të tërë të ekonomisë, nga industria dhe transporti, deri te shërbimet publike dhe inovacioni digjital. Përfaqësuesit e dy institucioneve evidentuan se implementimi i 5G kërkon jo vetëm investime të konsiderueshme në infrastrukturë, por edhe koordinim të ngushtë rregullator, veçanërisht në menaxhimin e spektrit dhe standardizimin e shërbimeve.
Në këtë kontekst, bashkëpunimi rajonal u vlerësua si një element kyç për të përshpejtuar procesin e harmonizimit me standardet e Bashkimit Evropian dhe për të shmangur fragmentimin e tregut. Një qasje e koordinuar në zhvillimin e rrjeteve me fibër optike dhe 5G mund të krijojë një treg më të integruar dhe më tërheqës për investitorët, duke rritur konkurrencën dhe cilësinë e shërbimeve për qytetarët dhe bizneset. /ekofin.al
