Këshilli i Ministrave miratoi sot një shtesë fondi në buxhetin e vitit 2022 miratuar për Ministrinë e Financave dhe Ekonomisë nga fondi rezervë i buxhetit të shtetit për zbatimin e ligjit “Për mbështetjen dhe zhvillimin e startup-eve”.
Në mbledhjen e qeverisë u vendos që Ministrisë së Financave dhe Ekonomisë, në programin 04130 “Mbështetje për zhvillimin ekonomik”, në zërin “Shpenzime korrente” (art. 604), i shtohet fondi prej 300 000 000 (treqind milionë) lekësh në buxhetin e miratuar për Agjencinë Shqiptare të Zhvillimit të Investimeve për vitin 2022, për zbatimin e ligjit nr. 25/2022, “Për mbështetjen dhe zhvillimin e startup-eve”.
Efekti financiar, i përcaktuar në pikën 1, të këtij vendimi, të përballohet nga fondi rezervë i buxhetit të shtetit, miratuar për vitin 2022.
Ngarkohen Ministria e Financave dhe Ekonomisë dhe Agjencia Shqiptare e Zhvillimit të Investimeve për zbatimin e këtij vendimi.
Ky vendim hyn në fuqi menjëherë dhe botohet në “Fletoren Zyrtare”.
Ligji “Për mbështetjen dhe zhvillimin e startup-eve” është një mbështetje e mirë për të rinjtë për ngritjen e bizneseve të reja, duke krijuar lehtësira për hyrjen në treg, zhvillimin e burimeve njerëzore, lehtësimin dhe mbështetjen në aksesimin në burime financiare.
