Shqipëria synon të zhvillojë më tej bujqësinë organike dhe të përmbushë standardet e Bashkimit Evropian, objektivi i të cilit është që 25% e tokës bujqësore të orientohet drejt prodhimeve të tilla.
Sipas Ministrisë së Bujqësisë dhe Zhvillimit Rural, ndryshimet e ligjit që rregullon prodhimin organik, etiketimet e produkteve organike dhe kontrollin e tyre pritet që t’u vijnë në ndihmë sektorit bujqësor dhe fermerëve për të kultivuar produktet e tyre bio. Përcaktimi i parimeve dhe rregullave për certifikim dhe etikim, do të sigurojë bazën për zhvillimin e qëndrueshëm, funksionimin e tregut të brendshëm, garantimin e konkurrencës dhe mbrojtjen e interesave të konsumatorëve.
Shqipëria ka rreth 800 ha sipërfaqe të kultivuar në bujqësi organike dhe përmes këtij projektligji synohet zgjerimi i tij, duke pasur parasysh se ky është një sektor në rritje, i cili po tërheq më shumë investime, si dhe vlera në tregun evropian e produkteve organike është rritur.
Fokusi do të jetë gjithashtu mbrojtja e diversitetit të tokës, si dhe nxitja e prodhimeve ushqimore me cilësi të lartë. Në vitet e fundit është shtuar ndjeshëm numri i fermave organike dhe eksporteve të këtyre produkteve drejt rajonit.
