Në mbledhjen e sotme të qeverisë u miratuan dy bashki të reja në kuadër të Paketës së Maleve.
Gjatë një deklarate për mediet, pas mbledhjes së qeverisë, ministri i Shtetit për Pushtetin Vendor, Ervin Demo bëri me dije se “sot kemi miratuar dy bashki përsa i përket zonave prioritare që është bashkia Gjirokastër dhe bashkia Fier”.
“Po ashtu paketa e maleve vazhdon me ritmin që ka pasur dhe besoj që dita ditës numri i aplikimeve vazhdon dhe të rritet”, tha Demo.
I pyetur nga gazetarët lidhur me akuzat deputetes së PD-së, Ina Zhupa për zbatimin e Paketës së Maleve në Sarandë, Demo tha se “kam dëgjuar akuza të ndryshme do të doja të nënvizoj faktin se Paketa e Maleve është një mundësi sa i përket zhvillimit ekonomik lokal sidomos atij rural”.
Demo sqaroi se “nuk bëhet fjalë për zonat urbane është e rëndësishme për të kuptuar që nuk përfshihen në asnjë rast prona, të cilat janë në pronësi individuale private. Aq më tepër që dy kategoritë të cilat mund të përfitojnë nëpërmjet Paketës së Maleve janë të përkufizuara saktësisht edhe në ligjin për këtë iniciativë, që ka të bëjë me kategoritë e atyre të cilët kanë përdorur një pronë për më shumë se 10 vjet, apo ata të cilët kanë një marrëdhënie me pronën historike të pronësisë edhe me paraardhësit e tyre”.
Demo shprehu besimin që sidomos roli që bashkitë luajnë në territor, duhet të kuptojmë që ky është një proces edhe një mjet në fakt zhvillimi që i është dhënë bashkive për ta përdorur.
“Jam i bindur që bashkitë do ndjekin të gjitha hapat për të garantuar që ne të kemi rastet e trajtuara ashtu siç ligji parashikon dhe mbi të gjitha për të garantuar zhvillimin ekonomik rural”, tha Demo.
