Në një takim me biznesmenë në Ardenicë, Lushnje, në qendër të diskutimeve ishin nevojat reale të MSE: më shumë qartësi, më pak burokraci dhe një bankë që kupton ritmin e tyre.
Pas çdo biznesi të vogël apo të mesëm ka një përditshmëri, që nuk duket gjithmonë nga jashtë. Ka plane për zgjerim, investime që duhen bërë në kohën e duhur, pagesa që nuk presin, mungesë e stafit të kualifikuar, furnitorë për t’u shlyer dhe një treg që ndryshon shpesh, më shpejt sesa parashikimet.
Pikërisht për këtë arsye kur bizneset flasin për nevojat që kanë nga banka e tyre, ato nuk e kufizojnë më pritshmërinë vetëm te financimi. Sot ato kërkojnë edhe diçka tjetër: më shumë shpejtësi, më shumë qartësi, procedura më të thjeshta dhe një partner që e kupton ritmin real të aktivitetit të tyre.
Këto ishin disa nga temat që dolën në pah gjatë takimit që OTP Bank Albania organizoi më 9 prill në Ardenicë, Lushnje, me klientë të segmentit MSE. Aktiviteti u zhvillua si një hapësirë e hapur diskutimi, ku fokusi nuk ishte vetëm vetë takimi, por dëgjimi i drejtpërdrejtë i shqetësimeve, problematikave dhe pritshmërive që bizneset kanë sot.
Në bisedat me sipërmarrësit u reflektua qartë se bizneset e vogla dhe të mesme kanë nevojë për zgjidhje që u përshtaten realisht cikleve të tyre të punës. Për ta, koha është shpesh po aq e rëndësishme sa edhe vetë financimi. Kur lind nevoja për kapital qarkullues, për një investim apo për të përballuar një periudhë më të ngarkuar, vonesat, paqartësitë apo proceset e tejzgjatura bëhen një barrë shtesë.
Këtë qasje e nënvizoi edhe znj. Gentjana Ciceri, Drejtore e Divizionit Retail dhe Anëtare e Bordit të OTP Bank Albania, e cila gjatë takimit u shpreh: “Për ne është shumë e rëndësishme të jemi pranë klientëve tanë dhe t’i dëgjojmë ata nga afër. Vetëm kështu kuptojmë realisht se çfarë i shqetëson, çfarë presin dhe ku duhet të fokusohemi për të qenë më të dobishëm për ta.”
Takimi në Ardenicë tregoi se nevojat e këtij segmenti shkojnë përtej shifrave dhe produkteve standarde. Ato lidhen me fleksibilitetin, me qartësinë e informacionit, me komunikimin e drejtpërdrejtë dhe me besimin që ndërtohet kur klienti ndien se zëri i tij dëgjohet.
Sepse në fund për një sipërmarrës, banka nuk është thjesht vendi ku merret një shërbim. Ajo është një pjesë e rëndësishme e rrugëtimit të biznesit, sidomos në momentet kur duhet marrë një vendim i rëndësishëm, ndjekur një mundësi e re apo përballuar një sfidë e papritur. Dhe sa më mirë të kuptohen këto nevoja, aq më e fortë bëhet marrëdhënia mes bankës dhe biznesit.
