Rreth 2.8 gigavat kapacitete të reja energjetike pritet t’i shtohen sistemit elektroenergjetik shqiptar në vitet në vijim, teksa projektet po shtohen ndjeshëm, kryesisht në energjinë diellore.
Të dhënat e Entit Rregullator të Energjisë tregojnë se vetëm nga projektet që kanë lidhur marrëveshje për lidhje në rrjet dhe që pritet të energjizohen gjatë viteve 2026–2027, kapaciteti arrin në rreth 830 MW. Këtyre u shtohen edhe projektet që kanë nënshkruar marrëveshje apo amendime gjatë vitit 2025, si dhe një numër i konsiderueshëm projektesh që kanë marrë opinion paraprak për lidhje në sistemin e transmetimit.
Nga analiza e projekteve rezulton se zhvillimi i sektorit po dominohet nga energjia diellore. Në listën e projekteve me marrëveshje të nënshkruara apo të amenduara gjatë vitit 2025 përfshihen parqe të mëdha fotovoltaike si Sunny Side Solar Park (122 MW), AKERNI Solar (100 MW), si dhe një seri projektesh me kapacitete nga 20 deri në 60 MW. Ndërkohë, në këtë listë shfaqen edhe projekte të tjera të rëndësishme si Parku Eolik i Spillesw (72.6 MW) dhe TEC Roskovec (170 MW), që mbetet kapaciteti më i madh individual në zhvillim.
Ky zgjerim i shpejtë i kapaciteteve sjell një sfidë të drejtpërdrejtë për rrjetin e transmetimit. Sipas ERE-s kjo do kërkojë një zhvillim më dinamik të rrjetit për të integruar këto burime në sistemin elektroenergjitik shqiptar në vitet në vijim. Për këtë qëllim OST sh.a. ka planifikuar për periudhën 2025-2027, investime në vlerën rreth 16 mld lekë, ku përfshihen ndërtimi apo rikonstruksioni i nënstacioneve, linja 220 kV dhe 400 kV, linja 110 kV, IT, siguri kibernetike, telekomunikacion, etj. /scantv
