Ministria e Ekonomisë dhe Inovacionit ka parashikuar një fond prej 4 miliardë lekësh në projektbuxhetin e vitit 2027 për indeksimin e pensioneve dhe afrimin e këtij procesi në muajin prill.
Gjatë prezantimit të projektbuxhetit 2027 në Komisionin për Ekonominë Punësimin dhe Financat, ministrja e Ekonomisë dhe Inovacionit, Delina Ibrahimaj, bëri të ditur se synohet që indeksimi i pensioneve të kryhet në muajin prill, pas ndryshimeve të ndërmarra në vitet e fundit për afatin e zbatimit të tij.
Ibrahimaj tha se pas ndërhyrjeve të nevojshme në vitin 2022, indeksimi ishte shtyrë nga muaji prill në tetor, ndërsa më pas ishte afruar në muajin korrik.
Sipas saj, me buxhetin e vitit 2027 synohet që ky proces të realizohet që në muajin prill.
“Gjithashtu, në buxhet është parashikuar edhe dyfishimi i bonusit mujor për pensionistët, në përputhje me angazhimin e përcaktuar në programin e qeverisë. Për këtë qëllim, është vënë në dispozicion një fond prej 20 miliardë lekësh”, tha Ibrahimaj.
1,25 mld lekë për strehimin në 2027
Lidhur me strehimin, Ibrahimaj tha se në fushën e strehimit, projektbuxheti i vitit 2027 parashikon një financim prej 1,25 miliardë lekësh, nga të cilat 745 milionë lekë për mbështetjen e drejtpërdrejtë të familjeve dhe 500 milionë lekë për investime”.
Për vitin 2027, shtoi Ibrahimaj, vijojmë financimin e programeve ekzistuese të strehimit, por njëkohësisht kemi parashikuar edhe ndërhyrje të reja, që synojnë zgjerimin e mundësive për strehim social dhe të përballueshëm.
“Konkretisht, 448 milionë lekë janë parashikuar për subvencionimin e interesave të kredive të lehtësuara. Përmes këtij financimi do të vijojë mbështetja për rreth 7 mijë familje përfituese, ndërsa synojmë të përfshijmë edhe rreth 1 mijë familje të reja gjatë vitit 2027. Për të ilustruar ecurinë e kësaj skeme, gjatë vitit 2026 kanë përfituar kredi të lehtësuara për banesë rreth 700 familje. Një tjetër instrument mbështetës është subvencionimi i qirasë, për të cilin kemi parashikuar 262 milionë lekë, me një objektiv prej rreth 2 mijë familjesh përfituese. Ndërkohë, 35 milionë lekë do të përdoren për mbështetjen e familjeve të prekura nga projekti i Unazës së Madhe, si dhe të familjeve në situata të veçanta vulnerabiliteti, përmes granteve të menjëhershme”, nënvizoi Ibrahimaj.
Sa i përket investimeve, Ibrahmaj informoi se 350 milionë lekë janë parashikuar për përmirësimin e kushteve të banimit.
“Në këtë kuadër, do të vijojnë ndërhyrjet për 663 familje në 26 bashki, ndërsa janë parashikuar edhe mbi 100 milionë lekë për ndërhyrje të reja. Këto investime shtrihen në një numër bashkish, përfshirë Matin, Librazhdin, Gramshin, Devollin, Dibrën dhe Tropojën, ku nevojat për përmirësimin e kushteve të banimit mbeten të konsiderueshme. Për vitin 2027, një drejtim i ri i politikës së strehimit është edhe krijimi gradual i një fondi publik banesash me qira sociale. Për këtë qëllim kemi parashikuar 150 milionë lekë për përshtatjen e godinave publike në pronësi të bashkive në banesa sociale me qira. Kjo ndërhyrje synon të krijojë një kapacitet më të qëndrueshëm strehimi, duke i dhënë mundësi pushtetit vendor të ofrojë zgjidhje afatgjata për familjet në nevojë, përtej instrumenteve të subvencionimit të përkohshëm”, tha Ibrahimaj.
Programe të reja dhe Fond Kombëtar për Strehimin
Njëkohësisht, shtoi ajo, po punojmë për zgjerimin e politikës së strehimit edhe drejt kategorive që nuk kualifikohen domosdoshmërisht për programet tradicionale të strehimit social, por që përballen me vështirësi reale për të siguruar një banesë me çmimet aktuale të tregut.
Ministrja Ibrahimaj bëri të ditur se po punohet edhe për ngritjen e Fondit Kombëtar të Strehimit Social dhe të Përballueshëm, i cili synon të krijojë një mekanizëm të integruar financimi, duke kombinuar burimet e buxhetit të shtetit, kontributet që rrjedhin nga detyrimet ligjore të zhvilluesve të ndërtimit, donacionet dhe financimet ndërkombëtare.
“Ky është një drejtim ku synojmë të kalojmë gradualisht nga mbështetja kryesisht përmes subvencioneve individuale drejt krijimit të një oferte më të qëndrueshme banesash sociale dhe të përballueshme”, tha Ibrahmimaj.
1,22 mld lekë investime në shkollat e arsimit profesional
Gjatë fjalës së saj, Ibrahimaj theksoi se një nga prioritetet kryesore mbetet zhvillimi i arsimit profesional dhe përmirësimi i shërbimeve të punësimit.
“Investimet në shkollat profesionale do të arrijnë në 1,22 miliardë lekë, nga të cilat 742 milionë lekë financim nga buxheti i shtetit dhe 480 milionë lekë në kuadër të bashkëpunimit me KfW-në gjermane”, tha ajo
Ministrja Ibrahimaj bëri të ditur se investimet do të vijojnë në shkollën “Pavarësia” në Vlorë, për të cilën janë parashikuar 158 milionë lekë, në shkollën e re “Karl Gega” në Tiranë me mbi 114 milionë lekë, si dhe në Shkollën Teknike të Korçës me 87 milionë lekë.
Sipas saj, ndërhyrje janë planifikuar edhe në Shkodër, Lushnjë, Kukës dhe Pogradec, ndërsa në programin e investimeve përfshihen projekte të reja në Fier dhe Tiranë.
“Për pajisjen e shkollave me laboratorë, makineri dhe mjete mësimore janë parashikuar 68,8 milionë lekë, me synimin për të përmirësuar formimin praktik dhe për të zgjeruar bashkëpunimin me sipërmarrjen, veçanërisht përmes arsimit dual”, tha Ibrahimaj.
Ministrja Ibrahimaj u shpreh se 168 milionë lekë do të investohen në infrastrukturën e shërbimeve të punësimit dhe formimit profesional.
“Ndër projektet kryesore janë Qendra Multifunksionale “Hermann Gmeiner”, me 80 milionë lekë, dhe kampusi i Qendrës së Formimit Profesional, me 45,8 milionë lekë”, tha Ibrahimaj.
1,64 mld lekë për sipërmarrjen dhe inovacionin
Sa i përket mbështetjes së sipërmarrjes dhe inovacionit Ibrahimaj bëri të ditur se për vitin 2027 janë parashikuar 1,64 miliardë lekë.
“Në këtë kuadër, fondi për startup-et do të jetë 600 milionë lekë, me një objektiv prej rreth 170 përfituesish”, tha ajo.
Ibrahimaj bëri të ditur se gjatë vitit 2026 janë regjistruar 1 219 aplikime në këtë skemë, nga të cilat janë financuar 163 startup-e dhe 42 produkte kanë arritur të dalin në treg.
“Një tjetër zhvillim është zgjerimi i modelit TUMO jashtë Tiranës, për të cilin janë parashikuar 160,7 milionë lekë, me synimin për të zgjeruar mundësitë e të rinjve për edukim teknologjik dhe zhvillimin e aftësive digjitale. Ndërkohë, për ndërmarrjet mikro, të vogla dhe të mesme është parashikuar një fond prej 100 milionë lekësh, i orientuar drejt modernizimit të proceseve të prodhimit, përmirësimit të standardeve dhe certifikimit të produkteve. Gjatë vitit 2026, në këtë skemë janë regjistruar 280 aplikime dhe 62 ndërmarrje janë shpallur përfituese”, theksoi Ibrahimaj.
Një projekt i ri, vijoi Ibrahimaj, që nis në vitin 2027 është Laboratori Kërkimor dhe Kantina Eksperimentale, në bashkëpunim me Universitetin Bujqësor të Tiranës, me financim prej 25 milionë lekësh.
“Ky projekt synon të forcojë lidhjen mes kërkimit universitar, inovacionit dhe sektorit prodhues”, tha Ibrahimaj.
Politika pro investimeve dhe nxitjes së eksporteve
Në drejtim të nxitjes së investimeve dhe eksporteve, ministrja Ibrahimaj u shpreh se “janë parashikuar 124,9 milionë lekë. Objektivat përfshijnë realizimin e 140 takimeve me kompani me kapital të huaj, identifikimin e të paktën 70 investitorëve potencialë, organizimin e 18 aktiviteteve promovuese dhe arritjen e 14 marrëveshjeve të bashkëpunimit”, tha Ibrahimaj.
Sa i përket integrimit europian dhe modernizimit të shërbimeve, Ibrahimaj tha se “një tjetër prioritet i projektbuxhetit është përgatitja e ekonomisë shqiptare për integrimin në tregun e përbashkët europian. Shqipëria ka adoptuar aktualisht 94,8% të standardeve të harmonizuara CEN dhe 99,3% të standardeve CENELEC, ndërsa për vitin 2027 synohet adoptimi i 2 578 standardeve të tjera dhe ofrimi i të paktën 43 mijë shërbimeve metrologjike”.
“Për pajisjen e laboratorëve janë parashikuar 10 milionë lekë, ndërsa vijon puna për zgjerimin e njohjes ndërkombëtare të shërbimeve të akreditimit. Aktualisht, 123 organizma të akredituar përfitojnë nga mekanizmat përkatës të njohjes ndërkombëtare. Në funksion të lehtësimit të tregtisë janë parashikuar 100 milionë lekë për vijimin e projektit të Lehtësimit të Tregtisë dhe Transportit në Ballkanin Perëndimor, në bashkëpunim me Bankën Botërore. Ndërkohë, për Qendrën Kombëtare të Biznesit janë parashikuar 145,8 milionë lekë, me fokus modernizimin e Regjistrit Tregtar në bashkëpunim me InfoCamere dhe përmirësimin e shërbimeve elektronike”, tha Ibrahimaj.
Parashikohet ngritja e Dhomës Ekonomike Kombëtare
Ministrja Ibrahimaj u shpreh se “projektbuxheti parashikon gjithashtu 46 milionë lekë për Dhomën Ekonomike Kombëtare, si dhe zgjerimin e strukturës përgjegjëse për reformën e koncesioneve dhe partneritetit publik-privat nga 12 në 30 punonjës”.
“Investimet dhe reformat e parashikuara synojnë të rrisin konkurrueshmërinë e ekonomisë shqiptare, të përmirësojnë klimën e biznesit dhe të përgatisin sipërmarrjen për standardet e tregut europian”, tha Ibrahimaj. /ekofin.al
