Gratë dominojnë popullsinë në Letoni, me diferenca të forta në disa qytete dhe zona rurale, ndërsa plakja e popullsisë po thellon më tej hendekun gjinor në moshat e treta. Të dhënat më të fundit të publikuara për fillimin e vitit 2025 tregojnë se në Letoni ka 116 gra për çdo 100 burra, ndërsa gratë përbëjnë 53.7% të totalit të popullsisë.
Në fillim të vitit 2025, Letonia numëronte rreth 1 milionë e 857 mijë banorë. Sipas statistikave, deri në moshën 44-vjeçare ka më pak gra sesa burra, një fenomen që lidhet edhe me faktin se në lindje numri i djemve është tradicionalisht më i lartë se ai i vajzave. Megjithatë, diferenca ndryshon ndjeshëm në grupmoshat më të mëdha për shkak të jetëgjatësisë më të lartë të grave dhe normave më të larta të vdekshmërisë tek burrat.
Në moshën riprodhuese, nga 15 deri në 49 vjeç, raporti mes gjinive është pothuajse i balancuar, me 49% gra dhe 51% burra. Por pas moshës 65-vjeçare situata ndryshon ndjeshëm, pasi në Letoni ka dy herë më shumë gra sesa burra në këtë grupmoshë.
Diferencat gjinore janë edhe më të theksuara në disa qytete të vendit. Qyteti me raportin më të lartë të grave ndaj burrave është Preiļi, ku ka 133 gra për çdo 100 burra. Pas tij renditen Valka me 132 gra, Krāslava me 131 gra, si edhe Mazsalaca dhe Olaine me nga 130 gra për 100 burra.
Në krahun tjetër, diferenca më e vogël gjinore në qytete rezulton në Durbe dhe Subate, ku raporti është pothuajse i balancuar, me 101 gra për 100 burra.
Edhe në zonat rurale dallimet janë të mëdha. Në famullitë Vecauce, Strūžāni, Kalncempji dhe Ramata raporti varion nga 125 deri në 130 gra për 100 burra. Ndërsa situata e kundërt paraqitet në famullinë Ķepova, ku burrat janë rreth 1.6 herë më të shumtë sesa gratë.
Po ashtu, në famullitë Jaunjelgava, Aksnīte, Vecumi, Zaļesje, Indrānu dhe Pilskalne, numri i burrave është rreth një të tretën më i lartë sesa ai i grave. Ndërkohë, në 20 njësi territoriale të Letonisë raporti gjinor është plotësisht i balancuar, me 100 gra për 100 burra, si në Raņķi, Kalēti apo Vietlava.
Statistikat reflektojnë sfidat demografike të Letonisë, ku emigracioni, plakja e popullsisë dhe diferencat në jetëgjatësi po ndikojnë ndjeshëm strukturën gjinore të vendit. /ekofin.al
