Ministri i Financave Petrit Malaj, deklaroi se qeveria synon krijimin e një stabiliteti fiskal dhe deri në vitin 2027 nuk do të ketë rritje të normave tatimore.
Duke marrë fjalën sot në Kuvend, gjatë diskutimit të pr/buxhetit 2025, në përgjigje të pyetjes që bëri deputeti i opozitës se, pse në 2025 nuk ka një paketë fiskale, Malaj shpjegoi se, sesi e parashikon qeveria rritjen e të ardhurave pa patur një paketë fiskale.
“Është hera e parë që qeveria del pa një paketë fiskale duke krijuar një stabilitet fiskal për të gjitha shoqëritë tregtare që deri në vitin 2027 nuk do të ketë rritje të normave tatimore”, tha ai.
Ministri u shpreh se ky është një lajm shumë i mirë për të gjithë subjektet, teksa tha se, qeveria ka projektuar realizimin e të ardhurave në disa drejtime.
Sipas tij, 1.2 miliardë lekë do të merren nga mirë administrimi tatimor dhe doganor, 14.8 miliardë lekë do të merren si rezultat i rritjes ekonomike dhe 9.2 miliardë lekë do të merren si rezultat i politikave buxhetore nga rritja e pagave të kryera në vitet 2023-2024 dhe i shfaq efektet në shtator 2025.
