Krahasimi i të dhënave të Inspektorit të Lartë të Drejtësisë për vitet 2024 dhe 2025 tregon se numri i ankesave ndaj gjyqtarëve dhe prokurorëve ka vijuar të rritet, ndërsa ritmi i hetimeve disiplinore mbetet relativisht i ulët në raport me volumin e pretendimeve të qytetarëve.
Sipas raportit të ILD-së për vitin 2025, gjatë vitit janë depozituar 1,792 ankesa të reja, nga 1,718 persona fizikë dhe 74 persona juridikë. Bashkë me 1,480 ankesa të mbartura nga viti 2024, numri total i çështjeve në trajtim arriti në 3,272 ankesa. Nga këto, ILD shqyrtoi 1,635 ankesa gjatë vitit 2025.
Në raport me vitin 2024, ka një rritje të volumit të punës. Një vit më parë, sipas raportimit publik të ILD-së, ishin shqyrtuar 1,378 ankesa, ndërsa në total ishin administruar rreth 2,874 ankesa. Pra, në vitin 2025 numri i ankesave të shqyrtuara është rritur me rreth 18.6%, ndërsa ankesat e reja të depozituara mbeten në nivele të larta.
Megjithatë, edhe pse ka rritje të ankesave dhe të volumit të shqyrtimit, hetimet disiplinore rezultojnë më të pakta se një vit më parë. Në vitin 2024, ILD kishte miratuar 23 vendime për hetim disiplinor ndaj 25 magjistratëve, ndërsa në vitin 2025 janë miratuar vetëm 12 vendime për fillim hetimi disiplinor ndaj 13 magjistratëve.
Raporti i vitit 2025 tregon se 7 magjistratë janë hetuar mbi bazë ankese; 4 magjistratë janë hetuar me iniciativë të ILD-së dhe me nismë të ankuesit; 2 magjistratë janë hetuar vetëm me iniciativë të ILD-së.
Në vitin 2024, nga 25 subjektet e hetuara, 14 hetime kishin nisur mbi bazë ankese dhe 11 me iniciativë të ILD-së.
Tregues që mbetet problematik edhe në vitin 2025 është numri i ulët i referimeve nga vetë drejtuesit e sistemit të drejtësisë. Në vitin 2024, në ILD ishin paraqitur vetëm 2 ankime nga kryetarët e gjykatave dhe 20 nga drejtuesit e prokurorive. Në vitin 2025, situata mbetet pothuajse në të njëjtat nivele: janë regjistruar vetëm 1 ankim nga kryetarët e gjykatave dhe 8 ankime nga drejtuesit e prokurorive.
Hetimet disiplinore dhe masat e propozuara
Gjatë vitit 2025, Inspektori i Lartë i Drejtësisë nisi hetim disiplinor ndaj 13 magjistratëve, pas dyshimeve të arsyeshme për shkelje gjatë ushtrimit të detyrës. Shkeljet kryesore lidhen me vonesa dhe zvarritje të pajustifikuara të procedurave në 5 raste, mospërmbushje të përsëritur të funksioneve gjatë gjykimit ose hetimit në 4 raste, si dhe veprime apo mosveprime që kanë sjellë përfitime të padrejta ose dëme për palët në proces në 3 raste. Hetimet kanë përfshirë gjithashtu shkelje të rënda të legjislacionit procedural dhe material, si edhe nxjerrje të akteve të paarsyetuara.
Në përfundim të hetimeve disiplinore, ILD miratoi 23 vendime për 25 magjistratë, ku për 8 prej tyre kërkoi nisjen e procedimit disiplinor pranë KLGJ dhe KLP. Për 6 magjistratë hetimi u mbyll pasi nuk u konstatuan shkelje disiplinore, ndërsa për 11 të tjerë procedura u mbyll për shkak të humbjes së statusit të magjistratit.
Më konkretisht, sipas raportit, Inspektori i Lartë i Drejtësisë ka paraqitur 3 kërkesa për procedim disiplinor në Këshilli i Lartë Gjyqësor, ku në një rast është kërkuar “ulje e përkohshme e pagës deri në 40 % për një periudhë jo më të gjatë se një vit”, procedurë që vijon të jetë ende në proces. Ndërsa në dy raste të tjera është kërkuar masë “vërejtje publike”, ku një kërkesë është pranuar dhe tjetra është rrëzuar.
Ndërkohë, Inspektori i Lartë i Drejtësisë ka paraqitur 5 kërkesa për procedim disiplinor në Këshilli i Lartë i Prokurorisë. Në një rast është kërkuar “shkarkim nga detyra”, por procedura është mbyllur pa vendim përfundimtar. Në dy raste të tjera është propozuar “ulje e përkohshme e pagës deri në masën 40% për një periudhë njëvjeçare”, ku një procedim është mbyllur pa vendim përfundimtar dhe tjetri është pezulluar. Gjithashtu, në dy raste është kërkuar masë “vërejtje publike”, por të dyja kërkesat janë rrëzuar.
Sipas raportit, dy kërkesa për procedim disiplinor të paraqitura në KLP janë mbyllur pa një vendim përfundimtar për shkak të humbjes së statusit të magjistratit nga subjektet e proceduara disiplinarisht.
Raporti tregon gjithashtu se niveli i ankimeve kundër vendimeve të ILD ka qenë i ulët. Nga 835 vendime të ankimueshme, vetëm 116 janë ankimuar, ndërsa asnjë vendim për mbyllje të hetimit disiplinor nuk është kundërshtuar.
Sipas ILD, asnjë prej ankimeve të shqyrtuara nuk është kthyer për rishqyrtim nga komisionet përkatëse të KLGJ dhe KLP. /ekofin.al
