Gjiganti gjerman i aviacionit Lufthansa po forcon pozitat në tregun europian të transportit ajror, pasi njoftoi se do të marrë kontrollin e shumicës së aksioneve të ITA Airways përmes një marrëveshjeje me vlerë 325 milionë euro.
Sipas planit të miratuar nga bordi drejtues i kompanisë, Lufthansa do të blejë edhe 49% të aksioneve të kompanisë italiane, duke e çuar pjesëmarrjen e saj nga 41% në 90%. Marrëveshja pritet të finalizohet në fillim të vitit 2027, pasi të marrë miratimet rregullatore nga Bashkimi Europian dhe autoritetet amerikane.
Lëvizja konsiderohet si një nga marrëveshjet më të rëndësishme në sektorin europian të aviacionit në vitet e fundit dhe pjesë e strategjisë së Lufthansa-s për të zgjeruar ndikimin në tregun mesdhetar dhe transatlantik.
ITA Airways, e krijuar si pasardhëse e kompanisë historike Alitalia pas falimentimit të saj, është kthyer gradualisht në pjesë të orbitës së grupit gjerman. Që prej hyrjes së Lufthansa-s në aksionariat në vitin 2025, kompania italiane ka nisur integrimin operacional me grupin, duke iu bashkuar edhe aleancës globale Star Alliance.
Sipas drejtuesve të Lufthansa Group, integrimi i ITA Airways po ecën më shpejt se çdo proces tjetër i ngjashëm i realizuar më parë nga kompania. Përmes kësaj marrëveshjeje, Roma synohet të shndërrohet në një qendër strategjike për fluturimet drejt Amerikës së Jugut, Afrikës dhe rajonit të Mesdheut.
ITA Airways ka shënuar edhe përmirësime financiare gjatë vitit të fundit. Sipas raportimeve ndërkombëtare, kompania regjistroi fitimin e saj të parë vjetor neto në vitin 2025, rezultat që lidhet edhe me sinergjitë operative dhe uljen e kostove pas hyrjes së Lufthansa-s në strukturën aksionare.
Aktualisht, qeveria italiane përmes Ministrisë së Ekonomisë dhe Financave zotëron 59% të aksioneve, por pas përfundimit të marrëveshjes do të mbajë vetëm 10%, me mundësi që edhe kjo pjesë të blihet nga Lufthansa në vitet e ardhshme.
Analistët e tregut e shohin këtë marrëveshje si pjesë të një vale të re konsolidimi në industrinë europiane të aviacionit, ku kompanitë e mëdha po kërkojnë të rrisin kapacitetet dhe rrjetin ndërkombëtar përballë kostove në rritje, konkurrencës globale dhe presionit për tranzicion të gjelbër.
Për Lufthansa-n, Italia mbetet një nga tregjet më të rëndësishme të pasagjerëve në Europë, ndërsa për ITA Airways marrëveshja shihet si një mundësi për stabilitet financiar dhe zgjerim ndërkombëtar pas viteve të vështira që pasuan fundin e Alitalia-s. /Përshtati nga Euronews, ekofin.al
