Seti vullnetar i rregullave që rregullojnë Inteligjencën Artificiale është vonuar, por pritet të dalë para gushtit, sipas Komisionit Evropian.
Gjigandët amerikanë të teknologjisë, Amazon, IBM, Google, Meta, Microsoft dhe OpenAI, i kanë bërë thirrje Komisionit Evropian që ta mbajë Kodin e Praktikës së ardhshme mbi IA-në për Qëllime të Përgjithshme (GPAI) “sa më të thjeshtë të jetë e mundur”, sipas procesverbalit të publikuar së fundmi për takimin e mbajtur javën e kaluar.
Në një takim me Werner Stengg, një zyrtar në kabinetin e Komisioneres së Teknologjisë të BE-së, Henna Virkkunen, kompanitë thanë se kodi “duhet të jetë sa më i thjeshtë të jetë e mundur, në mënyrë që të shmanget raportimi i tepërt dhe barra administrative e panevojshme”.
Kodi vullnetar i Praktikës mbi GPAI synon të ndihmojë ofruesit e modeleve të IA-së – siç janë modelet e mëdha gjuhësore si ChatGPT, të jenë në përputhje me Aktin e IA-së të BE-së.
Drafti përfundimtar duhej të dilte më 2 maj, por u vonua sepse Komisioni “mori një numër kërkesash për të lënë konsultimet të hapura më gjatë se sa ishte planifikuar fillimisht”.
Ekzekutivi i BE-së emëroi trembëdhjetë ekspertë shtatorin e kaluar për të punuar në udhëzime dhe organizoi seanca plenare dhe punëtori duke u mundësuar rreth 1,000 pjesëmarrësve të ndanin reagime. Tekstet e mëparshme u kritikuan nga botuesit për ndikimet në rregullat e të drejtës së autorit, ndërsa kompanitë e mëdha të teknologjisë amerikane thanë se drafti do të pengonte inovacionin dhe do të rezultonte i rëndë.
Kompanitë i thanë Stengg se teksti përfundimtar duhet “t’u japë nënshkruesve të tij kohë të mjaftueshme për të zbatuar angazhimet e ndryshme pas publikimit të versionit përfundimtar të Kodit” dhe paralajmëruan se nuk duhet të shkojë përtej fushëveprimit të synuar të vetë Aktit të IA-së.
Më herët këtë muaj, anëtari i ABBA-s, Björn Ulvaeus, i paralajmëroi ligjvënësit në Bruksel se është i shqetësuar për “propozimet e nxitura nga kompanitë e mëdha teknologjike” që dobësojnë të drejtat krijuese sipas Aktit të IA-së. Artisti – i cili është president i Konfederatës Ndërkombëtare të Shoqërive të Autorëve dhe Kompozitorëve (CISAC) – u bëri jehonë shqetësimeve të shprehura nga aktorë të tjerë të industrisë krijuese në muajt e fundit.
Komisioni tha më parë se qëllimi është të publikojë draftin e fundit “para verës”. Më 2 gusht, hyjnë në fuqi rregullat mbi mjetet e IA-së të GP-së. Vetë Akti i IA-së – i cili rregullon mjetet e IA-së sipas rrezikut që ato paraqesin për shoqërinë – hyri në fuqi në gusht të vitit të kaluar. Dispozitat e tij zbatohen gradualisht, përpara se Akti të jetë plotësisht i zbatueshëm në vitin 2027./Përshtati nga Euronews, ekofin.al
