Institucionet më të rëndësishme ndërkombëtare kanë përditësuar parashikimet e tyre me rritje sa i takon ecurisë së ekonomisë së vendit tonë.
Pas Fondit Monetar Ndërkombëtar dhe Bankës Botërore së fundmi është Instituti i Vjenës (WIIW) ai që raporton për rritje me ritme më të shpejta të ekonomisë shqiptare sesa parashikimet e fillimvitit.
“Rimëkëmbja në formë “V” që ne shohim sugjeron se ekonomia është kthyer në rrugën e duhur dhe do të mbetet e shëndoshë. Rritja e PBB-së do të përshpejtohet në 6.4 % në vitin 2021 dhe do të qëndrojë mbi 4.5 % në periudhën afatmesme”, thuhet në raportin e WIIW-së.
Më herët, në muajin prill WIIW parashikonte një rritje ekonomike të Shqipërisë me rreth 4.5 %.
Sipas raportit, sektori i turizmit ka pasur një vit mbresëlënës dhe po i afrohet nivelit të tij para pandemisë.
“Rritja do të udhëhiqet nga investimet dhe nga kërkesa optimiste e jashtme dhe e brendshme, por rreziqet negative që rrjedhin nga tregjet ndërkombëtare dhe pandemia kërkojnë vigjilencë”, theksohet në raport.
