Inflacioni i matur sipas së Eurostat nuk ka lëvizur as për shkurtin, për të tretin muaj rradhazi, duke qëndruar në 2.4%, po aq sa në dhjetor 2024. Sipas metodologjisë së aplikuar nga INSTAT, indeksi i harmonizuar i çmimeve të konsumit mat ndryshimin e çmimeve për familjet shqiptare dhe të huajve në tregjet e pakicës, ndryshe nga IÇK, ku mbulohen vetëm shpenzimet e familjeve private shqiptare të kryera brenda dhe jashtë territorit të vendit.
Sipas të dhënave të publikuara sot nga Instituti i Statistikave, indeksi i harmonizuar i çmimeve të konsumin për muajin shkurt ishte 2.4%.
Rritja më e madhe e çmimeve prej 5,9 % vërehet në grupin “Argëtim dhe kulturë”, pasuar nga grupet “Pije alkoolike dhe duhan” me 4,1 %, “Mobilim, pajisje shtëpie dhe mirëmbajtje” dhe “Hotele, kafene dhe restorante” me 3,1 % secili, “Ushqime dhe pije joalkoolike” me 2,9 %, “Veshje dhe këpucë” me 2,3 %, “Shërbimi arsimor” me 1,8 %, “Mallra dhe shërbime të ndryshme” me 1,3 %, “Komunikimi” me 1,1 %, “Shëndeti” me 0,8 %. Nga ana tjetër, çmimet e grupit “Transporti” u ulën me 1,1 %, pasuar nga grupi “Qira, ujë, lëndë djegëse dhe energji” me 0,1 %.
Në muajin Shkurt 2025, ndryshimi mujor i matur nga Indeksi i Harmonizuar i Çmimeve të Konsumit është 0,3 %. Ky ndryshim është ndikuar kryesisht nga rritja e çmimeve të grupit “Ushqime dhe pije joalkoolike” me 0,8 %, pasuar nga grupet “Pije alkoolike dhe duhan” me 0,4 %, “Shëndeti” me 0,3 %, “Mobilim, pajisje shtëpie dhe mirëmbajtje, “Argëtim dhe kulturë”, “Hotele, kafene dhe restorante” dhe “Mallra dhe shërbime të ndryshme” me 0,2 % secili. Nga ana tjetër, çmimet e grupit “Qira, ujë, lëndë djegëse dhe energji” u ulën me 0,9 %, pasuar nga grupi “Veshje dhe këpucë” me 0,6 %.
Inflacioni në shkurt, sipas matjeve të Instat ishte 1.9%, po aq sa në muajin janar. /ekofin.al
