Këshilli Ekonomik Kombëtar ka zhvilluar mbledhjen e dytë të radhës për këtë vit, ku të pranishëm ishin Kryeministri Edi Rama, ministrja e Shtetit për Sipërmarrjen dhe Klimën e Biznesit, Delina Ibrahimaj, si dhe përfaqësues të sektorit të biznesit dhe komunitetit.
Mbledhja u fokusua në dy çështjet kyçe për zhvillimin ekonomik të vendit: aksesin në financa, si dhe tek aftësimi e punësimi.
Ministrja Ibrahimaj vuri theksin në rëndësinë që këto dy tema kanë në nxitjen e ekonomisë dhe rritjen e produktivitetit të vendit. Diskutimet u përqendruan tek identifikimi i sfidave dhe zgjidhjeve inovative që duhet të merren në drejtim të përmirësimit të këtyre dy treguesve.
“Në zhvillimin e dialogut ndërmjet Këshillit Ekonomik Kombëtar, komisioneve të posaçme që janë ngritur, si dhe biznesit, ne kemi krijuar katër komisione të posaçme për aftësimin dhe punësimin, turizmin, bujqësinë, si dhe politikat fiskale”, bëri me dije ministrja Ibrahimaj.
Ajo theksoi se, fokus i punës tonë të përbashkët është rritja e aksesit në financa, nxitja e aftësimit dhe punësimit, si dhe sistemi i ri i dhomave, si shtyllat kryesore të punës sonë në ndihmë të sipërmarrjes.
