Prokuroria e Rexho Kalabrisë ka nisur hetimet për një rast që përfshin kompaninë e shërbimeve bankare Revolut, të themeluar në Londër, e cila raportohet se tani po shantazhohet.
Një grup hakerësh mori të dhëna sensitive nga banka duke përdorur një adresë elektronike institucionale të komprometuar, që i përkiste Prefekturës së Rexho Kalabrisë.
Banka digjitale ka konfirmuar se të dhënat e rreth 680 klientëve evropianë janë prekur, por fondet e tyre nuk janë prekur.
Sipas Financial Times, e cila kontaktoi me kriminelët kibernetikë përmes Telegramit, grupi e quan veten “iamnotavillain” dhe të mërkurën pasdite publikoi në faqen e tij një kërkesë për shpërblim prej 3 milionë dollarësh, ekuivalente me 2.61 milionë euro.
Nëse paratë nuk paguhen brenda 24 orëve, hakerët kërcënojnë se do t’ua shesin të dhënat sensitive organizatave të tjera kriminale.
Edhe Drejtoria Kombëtare Antimafia dhe Antiterrorizëm po punon për rastin, pasi në të është përfshirë një institucion shtetëror. Seksioni i policisë për krimet kibernetike thotë se bëhet fjalë për një operacion shumë të sofistikuar, por disa çështje ende duhet të sqarohen.
Një kërkesë e pazakontë për shpërblim
Grupi publikoi kërkesën për shpërblim në faqen e tij në rrjetin e errët (dark web). Financial Times vëren se publikimi i një kërkese të tillë është i pazakontë; zakonisht, kërkesat për shpërblim dhe rastet e shantazhit bëhen fillimisht në mënyrë private dhe publikohen vetëm nëse objektivi refuzon të paguajë.
Në këtë rast, megjithatë, gazeta britanike mori një mesazh ku kërkohej që Revolut të transferonte “6,000 XMR / 3,000,000 dollarë… përndryshe të gjitha të dhënat do të shiten dhe do të keni gjak në duart tuaja”.
XMR është simboli i kriptomonedhës Monero, e cila përdoret shpesh në aktivitete të paligjshme për shkak se është e vështirë të gjurmohet.
Grupi kriminal i tha gjithashtu gazetës se kjo ishte hera e parë që përdorte faqen e tij për një kërkesë shpërblimi dhe se ende nuk kishte kontaktuar bankën për të nisur negociatat.
Pas publikimit të kërkesës për shpërblim, hakerët i dërguan Financial Times një video-regjistrim 60-sekondësh të ekranit, ku një përdorues i paidentifikuar shfletonte një koleksion dokumentesh, që mund t’i përkisnin Revolut.
Thuhet se informacioni i marrë nga Revolut përfshin të dhëna nga pasaportat, lejet e drejtimit, dokumente të tjera identifikimi dhe fotografi. Hakerët pretendojnë se zotërojnë gjithsej 147 gigabajt të dhëna.
Deri ku ka avancuar hetimi
Prokurorët po shqyrtojnë veprën penale të ndërhyrjes së paautorizuar në një sistem informatik me interes publik.
Një raport fillestar i policisë së krimeve kibernetike tregon se operacioni, i cili zgjati për muaj të tërë, ishte shumë i sofistikuar. Ende nuk është e qartë nëse është komprometuar një kompjuter i Prefekturës së Rexho Kalabrisë apo i Ministrisë së Brendshme të Italisë.
Ekspertët po përpiqen gjithashtu të përcaktojnë nëse adresa elektronike institucionale, nga e cila u dërguan kërkesat, ishte hakuar apo klonuar.
Krahas Prokurorisë Kombëtare Antimafia dhe Antiterrorizëm, në çështje është përfshirë edhe Autoriteti Italian për Mbrojtjen e të Dhënave Personale, i cili ka nisur menjëherë kontrolle për shkelje të mundshme të sigurisë në bankat italiane dhe u ka kërkuar zyrtarëve përgjegjës për mbrojtjen e të dhënave që të kryejnë një “rishikim të menjëhershëm” dhe, nëse konstatohen dobësi, ta njoftojnë menjëherë autoritetin.
Autoriteti italian për privatësinë ka kontaktuar gjithashtu homologun e tij në Lituani, ku ndodhet selia e regjistruar e Revolut, duke nisur shkëmbimin e informacionit për të forcuar përpjekjet për t’iu kundërvënë kërcënimit.
Hetimi do të përcaktojë mënyrën se si është kryer sulmi dhe nëse janë prekur edhe institucione të tjera publike. /Përshtati nga Euronews, ekofin.al
