Ministria e Brendshme Gjermane njoftoi se do të krijohej një aplikacion që qytetarët të gjejnë bunkerin e tyre më të afërt. Gjermania po harton një listë të ndërtesave publike dhe private që mund të shndërrohen në bunkerë nëse është e nevojshme. Në listë përfshihen parkingje makinash, stacione treni nëntokësor, ndërtesa shtetërore dhe prona private.
Njëkohësisht është duke u planifikuar edhe një aplikacion telefonik me një drejtori dixhitale të bunkerëve dhe strehimoreve emergjente, tha zëdhënësi, duke shtuar se qytetarët gjithashtu do të inkurajohen të shndërrojnë bodrumet dhe garazhet e tyre në vendstrehime.
Media gjermane “BILD” raportoi fillimisht planin të hënën, duke thënë se ishte një përgjigje ndaj një kërcënimi ndërkombëtar në përkeqësim, veçanërisht nga Rusia.
Një zëdhënës i ministrisë nuk përmendi një përkeqësim të situatës së sigurisë, por tha se plani ishte një projekt i madh që do të merrte pak kohë dhe do të përfshinte autoritete të shumta.
Organizatat e mbrojtjes civile në Gjermani kanë bërë thirrje për zgjerimin e vendstrehimeve nga bombat në vend, i cili aktualisht ka 579 bunkerë – shumica e të cilëve datojnë nga Lufta e Dytë Botërore.
Plani thuhet se u ra dakord në qershor dhe po shqyrtohet nga një forcë e krijuar posaçërisht për këtë qëllim.
Mbrojtja e brendshme e Gjermanisë
Gjermania i ka kushtuar vëmendje gjithmonë e më shumë mbrojtjes në vend që nga pushtimi i plotë i Ukrainës nga Rusia në shkurt 2022.
Kancelari gjerman Olaf Scholz premtoi të forcojë ushtrinë e vendit pas pushtimit, me një sërë investimesh dhe projekte armatimi. Që atëherë, ushtria ka pasur buxhet të kufizuar.
Roderich Kiesewetter, një ekspert i mbrojtjes dhe deputet nga Bashkimi Kristian Demokratik i opozitës, i tha kohët e fundit “Frankfurter Allgemeine” se buxheti i ushtrisë do të duhej të trefishohej për të adresuar siç duhet nevojat dhe kërcënimet aktuale.
Këtë muaj, media lokale raportoi mbi “Operation Plan Germany” – një dokument i klasifikuar që detajon se si Gjermania mund të mbështeste vendosjen e mijëra trupave të NATO-s në Ukrainë në rast të përshkallëzimit të kërcënimeve bërthamore nga Rusia.
Në tetor, një grup zyrtarësh të inteligjencës gjermane paralajmëruan parlamentin se Rusia do të kishte kapacitetin për të kryer një sulm kundër NATO-s deri në fund të dekadës.
