Vlerësimi vjen nga e përjavshmja britanike The Economist, e cila renditi 36 vendet më të pasura të botës. Luís Montenegro e quajti këtë një “vlerësim të drejtë për meritën dhe punën e palodhur të popullit portugez”.
Portugalia është shndërruar në mënyrë të heshtur në performuesen më të suksesshme të eurozonës, duke kryesuar renditjen e The Economist për ekonomitë globale në vitin 2025.
Ajo fitoi këtë veçim bazuar në inflacionin, prodhimin e brendshëm bruto, tregun e punës dhe të dhënat e tregjeve financiare të 36 vendeve më të pasura në botë.
Ekonomia jugperëndimore evropiane u përshkrua si “e ëmbël si një pastel de nata”, duke iu referuar ëmbëlsirës tradicionale portugeze me krem pastiçerie.
“Edhe investitorët portugezë kanë bërë mirë, me tregun e aksioneve që është rritur me më shumë se 20% në vitin 2025”, theksohet në renditje.
Pas Portugalisë renditen Irlanda dhe Izraeli. Spanja, fituese e vitit të kaluar, tani ndan vendin e katërt me Kolumbinë, e ndjekur nga Republika Çeke dhe Greqia — duke nënvizuar një trend më të gjerë të përshpejtimit të rritjes në Evropën Jugore. “Anëtarë të tjerë të eurozonës që u përballën me vështirësi në vitet 2010, përfshirë Greqinë (fituesen tonë në 2022 dhe 2023) dhe Spanjën, janë gjithashtu mes vendeve kryesuese”, shkruan artikulli.
Vendet e Evropës Qendrore dhe Lindore, si Sllovakia, Finlanda dhe Estonia, renditen në fund të listës.
Në rrjetet sociale, kryeministri Luís Montenegro tha se renditja “forcon motivimin e qeverisë për të vazhduar në rrugën që na ka sjellë deri këtu muajt e fundit”./Përshtati nga Euronews, ekofin.al
