Kalimi nga ekonomia tradicionale drejt asaj digjitale, një tendencë globale, në Shqipëri do të mbështetet nga institucionet shtetërore nëpërmjet krijimit të parqeve teknologjike dhe shkencore.
Projektligji “Për krijimin dhe funksionimin e parqeve teknologjike dhe shkencore”, i hartuar nga Ministria e Financave dhe Ekonomisë u miratua në Komisionin Parlamentar të Ekonomisë dhe Financave.
Përmes këtij p/ligji parashikohet që parqet teknologjike të kenë statusin e zonës të lirë doganore, duke u përjashtuar nga taksat.
Drejtori i Përgjithshëm i Korporatës së Investimeve Shqiptare (AIC), Ermal Frashëri, i pranishëm në Komision, bëri të ditur se qëllimi është të përshpejtojë zhvillimin ekonomik duke tërhequr kapitalin e huaj dhe vendas, i dedikuar për zhvillimin e teknologjive të reja, aplikimin në ekonominë kombëtare, për të rritur konkurrencën dhe për të rritur nivelin e punësimit në interes të publikut.
Pasuritë e paluajtshme, në të cilat do të krijohet parku, merren në përdorim nga zhvilluesi pas lidhjes së kontratës së qirasë, për një periudhë kohe jo më pak se 20 (njëzet) vjet, e cila miratohet me vendim të Këshillit të Ministrave. Zhvilluesi gëzon të drejtën e dhënies së pasurisë së paluajtshme me nënqira
te përdoruesit.
Krijimi i parqeve teknologjike e shkencore është dëshmuar një mjet i fuqishëm për zhvillim.
Me këtë ligj synohet që parqet të kenë statusin e zonës së lirë doganore.
Konkretisht, hyrja dhe dalja e mallrave në/nga park/u, të cilat do të shërbejnë për nxjerrjen e “produktit inovativ”, formalitetet dhe procedurat përkatëse kryhen sipas dispozitave të Kodit Doganor; furnizimi i mallrave shqiptare të destinuara për t’u vendosur në park, të cilat do të shërbejnë për nxjerrjen e “produktit inovativ”, konsiderohen si furnizim për eksport me shkallë 0 (zero), në përputhje me përcaktimet e ligjit për tatimin mbi vlerën e shtuar dhe të legjislacionit doganor;
norma e tatimfitimit është 0 (zero) për 15 (pesëmbëdhjetë) vite të njëpasnjëshme për ato të ardhura që gjenerohen nga aktivitetet, të cilat zhvillohen në park; pagat e personelit që punon në kërkim-zhvillim të përdoruesit në park dhe i gjithë stafi i zhvilluesit përjashtohen nga të gjitha taksat për një periudhë 10-vjeçare;
përjashtohen nga TVSH-ja mallrat, pajisjet dhe shërbimet e përdorura në park, të cilat do të shërbejnë për nxjerrjen e “produktit inovativ”; përjashtohen nga taksa e ndikimit në infrastrukturë; përjashtohen nga taksa e pasurisë së paluajtshme për një periudhë 10-vjeçare për ndërtimet e realizuara në park; kostot e trajnimit për punonjësit shkencorë dhe teknikë në park mund të rimbursohen pjesërisht nga shteti, sipas kritereve, rregullave dhe procedurave respektive të miratuara me vendim të Këshillit të Ministrave.
