Pas një tendencave rënese të fillimvitit, kursimet e shqiptarëve në banka janë rikthyer në rritje gjatë muajit maj. Të dhënat e Bankës së Shqipërisë tregojnë se depozitat e përfshira në paranë e gjerë arritën në rreth 1.53 trilionë lekë në fund të majit 2026.
Krahasuar me muajin prill, depozitat u rritën me rreth 32 miliardë lekë, ose afërsisht 2.1% më shumë. Kjo tregon një rikthim të interesit për të mbajtur para në sistemin bankar, pas luhatjeve të muajve të parë të vitit.
Pjesa më e madhe e këtyre kursimeve vazhdon të mbahet në valutë të huaj, kryesisht euro. Në maj, depozitat në valutë u rritën në rreth 782 miliardë lekë, nga rreth 765 miliardë në prill. Pra, qytetarët dhe bizneset shtuan kursimet në monedha të huaja me rreth 18 miliardë lekë.
Edhe depozitat në lekë shënuan rritje. Ato arritën në rreth 751 miliardë lekë, duke u shtuar me rreth 14 miliardë lekë krahasuar me muajin paraardhës. Rritja është parë si te depozitat që përdoren për pagesa të përditshme, ashtu edhe te ato kursimore.
Nëse shohim llojin e depozitave, rritja kryesore në maj erdhi nga depozitat e transferueshme, pra paratë që mund të përdoren menjëherë për pagesa dhe transaksione. Kjo tregon më shumë lëvizje të parasë në ekonomi.
Për sa i përket grupeve që mbajnë këto kursime, pjesën më të madhe vazhdojnë ta kenë sektorët e tjerë rezidentë, ku përfshihen kryesisht individët dhe familjet. Ata mbajnë qindra miliarda lekë në banka dhe mbeten kontribuesit kryesorë të depozitave.
Edhe bizneset kanë pasur lëvizje të depozitave gjatë muajit, duke pasqyruar aktivitetin ekonomik, pagesat dhe nevojat për likuiditet.
Në përgjithësi, të dhënat për majin tregojnë se kursimet në banka kanë marrë një drejtim pozitiv. Rritja e depozitave tregon se qytetarët dhe bizneset vazhdojnë të kenë besim te sistemi bankar, ndërsa niveli i lartë i kursimeve mbetet një element i rëndësishëm për stabilitetin financiar të vendit./Scantv
