Gjatë vitit 2025, gjithnjë e më shumë pagesa janë kryer përmes kanaleve elektronike të bankave.
Sipas të dhënave nga Banka e Shqipërisë, bizneset kanë realizuar mbi 16.7 milionë transaksione elektronike, me një vlerë totale prej rreth 953 miliardë lekësh. Pjesa dërrmuese janë pagesa debitimi, pra para që dalin nga llogaria e biznesit për shlyerjen e faturave, qirasë, pagesave ndaj furnitorëve dhe detyrimeve të përditshme. Këto debitime përbëjnë mbi 16.6 milionë transaksione, por me vlera të vogla për çdo veprim.
Në të kundërt, transfertat ku bizneset marrin para në llogari janë shumë më të pakta në numër, por shumë më të mëdha në vlerë. Rreth 147 mijë transferta kreditimi kanë qarkulluar mbi 813 miliardë lekë, duke përfshirë pagesa pagash, disbursime kredish dhe transfertë fondesh mes kompanive.
Edhe tek individët po vërehet i njëjti orientim drejt pagesave elektronike. Gjatë vitit 2025, qytetarët kanë kryer rreth 15.9 milionë transaksione periodike, me një vlerë totale prej 342 miliardë lekësh. Mbi 12.8 milionë prej tyre janë debitime, që lidhen me këste kredish, pagesa me kartë, si dhe pagesa të shërbimeve bazë, si energjia, uji apo interneti.
Transfertat ku individët marrin para në llogari, si pagat, interesat e depozitave apo kreditë, janë rreth 3 milionë transaksione, me një vlerë mbi 227 miliardë lekë.
Tremujori i tretë i vitit shënon volumin më të lartë të këtyre pagesave elektronike, si për bizneset ashtu edhe për individët, duke reflektuar rritjen sezonale të aktivitetit ekonomik gjatë verës.
Në praktikë, këto të dhëna tregojnë se qytetarët dhe bizneset po përdorin gjithnjë e më shumë kanalet digjitale të bankave për pagesat e përditshme, duke rritur formalizimin e ekonomisë dhe duke ulur varësinë nga transaksionet jashtë sistemit bankar./Scan tv
