Paraja cash vijon të mbetet një nga format më të përdorura të transaksioneve në Shqipëri, pavarësisht rritjes së pagesave elektronike dhe përdorimit të shërbimeve bankare online. Të dhënat për tremujorin e parë të vitit 2026 tregojnë se si bizneset ashtu edhe qytetarët vazhdojnë të kryejnë një numër të konsiderueshëm veprimesh me para në dorë.
Sipas shifrave zyrtare nga Banka e Shqipërisë, bizneset kanë realizuar gjatë tre muajve të parë të vitit mbi 802 mijë transaksione cash, me një vlerë totale prej afro 370 miliardë lekësh. Kjo do të thotë se çdo ditë, mijëra kompani dhe sipërmarrje kanë vijuar të përdorin sportelet bankare për të depozituar apo tërhequr para fizike.
Pjesa dërrmuese e këtyre veprimeve lidhet me depozitimet në para në dorë. Vetëm gjatë tremujorit të parë, bizneset kanë depozituar në sistemin bankar rreth 267 miliardë lekë, ndërsa kanë tërhequr nga llogaritë e tyre mbi 102 miliardë lekë.
Nga ana tjetër, edhe individët vazhdojnë të mbështeten ndjeshëm te paraja cash. Gjatë tremujorit të parë janë regjistruar mbi 859 mijë transaksione në arkë, me një vlerë totale prej më shumë se 183 miliardë lekësh.
Qytetarët kanë depozituar në banka rreth 106 miliardë lekë, ndërsa kanë tërhequr afro 78 miliardë lekë. Kjo tregon se një pjesë e konsiderueshme e kursimeve dhe e qarkullimit financiar të familjeve shqiptare vijon të kalojë përmes parasë fizike.
Një tjetër tregues interesant është se individët kanë kryer më shumë transaksione në numër sesa bizneset, por vlera e tyre ka qenë dukshëm më e ulët. Ndërsa bizneset kanë realizuar transaksione me vlera më të mëdha, të lidhura me aktivitetin ekonomik dhe pagesat e përditshme, qytetarët kanë kryer veprime më të shumta, por kryesisht për nevoja personale dhe familjare.
Në total, vetëm gjatë tre muajve të parë të vitit, bizneset dhe individët kanë realizuar mbi 1.6 milionë transaksione cash, me një vlerë që kalon 553 miliardë lekët. Shifrat tregojnë se, megjithëse digjitalizimi i pagesave po avancon, paraja në dorë vazhdon të ketë një rol të rëndësishëm në ekonominë shqiptare dhe mbetet një mjet i preferuar si për bizneset, ashtu edhe për qytetarët./Scantv
