Dy subjektet financiare jobanka, Micro Credit Albania dhe Final, janë bërë bashkë për të ankimuar vendimin e Bankës së Shqipërisë mbi revokimin e licencave të tyre. Këto dy institucione kërkojnë shfuqizimin e vendimit për heqjen e licencave, me pretendimin se Banka Qendrore nuk ka respektuar procedurat e parashikuara nga kuadri ligjor lidhur me vendimmarrjen përkatëse.
Sipas Micro Credit Albania, asnjë punonjësi apo ortaku të tyre, nuk i është komunikuar ndonjë akuzë zyrtare që mund të ketë lidhje ose jo me aktivitetin e shoqërisë. Një pretendim tjetër i dy institucioneve jo banka lidhet me faktin se ndalimi ligjor i ortakes së MCA, Elda Ibro, dhe ortakut të Final, Arben Meksuti, nuk ka lidhje me aktivitetin e këtyre shoqërive dhe nuk do të sillte ndikim negativ në veprimtarinë e ardhshme të MCA dhe Final.
Ndërkohë, në Fletoren Zyrtare janë botuar argumentet e Bankës së Shqipërisë, të cilat hedhin poshtë kërkesën e Micro Credit Albania dhe Final për shfuqizimin e vendimit mbi revokimin e licencës. Në lidhje me detyrimet që duhet të përmbushte pas pezullimit të aktivitetit, Banka e Shqipërisë ka deklaruar se administratori i MCA nuk ka raportuar ose nuk i është përgjigjur personalisht Bankës mbi plotësimin e detyrimeve. Më tej, edhe dërgimi i vendimit për revokimin e licencës është kthyer mbrapsht 2 herë nga shërbimi postar, pasi subjekti nuk gjendej në adresat e deklaruara.
Gjithashtu, Banka e Shqipërisë ka shtuar se reputacioni i themeluesit të shoqërisë dhe vërtetimi se nuk është në ndjekje penale, janë ndër kriteret kryesore që duhet të përmbushë një subjekt financiar jobankë.
Vendimi i Bankës për pezullimin e veprimtarisë në fund të vitit 2022, nuk është ankimuar në gjykatë nga “Micro Credit Albania” në atë kohë, duke pranuar në këtë mënyrë se vendimmarrja e Bankës së Shqipërisë ka qenë e drejtë. Ky subjekt nuk mori asnjëherë masa për eliminimin e shkeljeve dhe as nuk angazhoi strukturat e nevojshme për eliminimin e tyre. Për më tepër, ortakja e MCA i ka kërkuar vetë Bankës Qendrore në prill të këtij viti, që të lejojë dorëzimin e licencës nga MCA-ja.
Nga këto argumente, Banka vlerësoi se pretendimet e paraqitura në ankimin administrativ nga Final dhe Micro Credit Albania nuk janë të bazuara dhe nuk përbëjnë shkak për të marrë një vendim të ndryshëm nga ai për revokimin e licencës.
