Një shqiptar kryen mesatarisht 26 pagesa pa para në dorë përmes llogarisë së tij gjatë një viti.
Drejtoresha e Sistemeve të Pagesave, Kontabilitetit dhe Financës në Bankën e Shqipërisë, Ledia Bregu, në një takim të përbashkët me INNVEST dhe Ministrinë e Ekonomisë dhe Inovacionit, theksoi se nuk janë të pakta rastet kur llogaritë përdoren vetëm për përfitime sociale dhe më pas mbyllen.
“Nga viti 2018, kur numri i pagesave pa para për llogari ishte rreth 4.3, aktualisht kemi tejkaluar 26 pagesa elektronike për capita. Kjo do të thotë se një individ kryen mesatarisht të paktën 26 pagesa në vit. Megjithatë, krahasuar me standardet evropiane, ku ky numër arrin mbi 50 deri në 80, niveli ynë mbetet ende i ulët, megjithatë është një avancim i dukshëm krahasuar me vitet e mëparshme”, tha Bregu.
Ndërkohë, zëvendësministri i Ekonomisë dhe Inovacionit, Enkelejd Musabelliu, vuri theksin tek nisma që detyron bizneset e sektorëve të hotelerisë, turizmit dhe transportit të pajisen me terminal POS, duke nënvizuar nevojën për uljen e kostove të pagesave digjitale.
“Vizitorët e huaj që vijnë në vendin tonë kanë monedha dhe mënyra pagese të ndryshme, prandaj është e rëndësishme që të kenë lehtësim në pagesa. Për suksesin e kësaj nisme, kostot e pagesave elektronike duhet të jenë më të ulëta se ato të pagesave me para”, u shpreh Musabelliu.
Banka e Shqipërisë ndërhyn me “interchange fee” për të mbuluar pjesërisht kostot e pagesave elektronike për tregtarët. Megjithatë, detyrimi për pajisjen me terminal POS duhet të shoqërohet edhe me lehtësime tatimore ose fiskale, të cilat, megjithëse fillimisht ngarkojnë buxhetin, kontribuojnë më pas në formalizimin e biznesit dhe rritjen e të ardhurave nga taksat.
“Në strategjinë për pagesa pa para, nuk kemi parashikuar lehtësi tatimore, të cilat do të ishin shumë të dobishme. Studimet tregojnë se reduktimi i ekonomisë së padeklaruar përmes pagesave elektronike është shumë efektiv për ata tregtarë që një pjesë të volumit të tyre mujor e kryejnë me metoda elektronike”, shtoi Bregu.
Për të ofruar më shumë alternativa dhe për të nxitur konkurrencën, Banka e Shqipërisë po punon për zbatimin e sistemit të pagesave të menjëhershme, i cili do të mundësojë pagesa në dyqane përmes skanimit të një QR kodi me telefon.
