Maqedonia e Veriut duhet të investojë 6.4 miliardë dollarë (5.8 miliardë euro) gjatë dekadës së ardhshme për të mbrojtur efektivisht njerëzit dhe pronat nga ndikimet e ndryshimeve klimatike, paralajmëroi Banka Botërore përmes një raporti të fundit.
Vendi mund të përballet me dëme ekonomike deri në 4% të prodhimit të brendshëm bruto (PBB) deri në vitin 2050 për shkak të ndikimit të ndryshimit të klimës, tha Grupi i Bankës Botërore në Raportin e ri të Klimës dhe Zhvillimit të vendit (CCDR) për Maqedoninë e Veriut.
Sfidat klimatike të Maqedonisë së Veriut janë duke u intensifikuar, pasi është përballur me përmbytje shkatërruese dhe ngjarje ekstreme të motit, të tilla si shira intensive dhe valë të nxehti, që çuan në humbje prej 667 milionë dollarësh gjatë dy dekadave të fundit, thuhet në raport.
“Rreziqet natyrore prekin në mënyrë disproporcionale sektorët vulnerabël, veçanërisht bujqësinë, ku fermat e vogla familjare janë të prekura nga thatësira dhe breshri për shkak të ujitjes së pamjaftueshme, mbrojtjes nga breshri dhe sigurimit”, thotë Massimiliano Paolucci, Menaxher i Bankës Botërore për Kosovën dhe Maqedoninë e Veriut.
Për të arritur emetimet neto zero deri në vitin 2050 në përputhje me objektivat e BE-së, Maqedonia e Veriut duhet gjithashtu të investojë në përshtatjen klimatike, e cila përfshin ndërtimin e kapaciteteve të energjisë së rinovueshme prej 6.9 GW, elektrifikimin e sektorëve kyç—veçanërisht duke synuar që 90% e makinave të pasagjerëve të jenë elektrike dhe përmirësimin e eficiencës së energjisë për të kursyer 36% të energjisë vjetore të ngrohjes, sipas Grupit të Bankës Botërore.
Politikat tatimore mund të përdoren për të promovuar energjinë e rinovueshme dhe transportin e gjelbër, duke eliminuar subvencionet e qymyrit duke mbrojtur familjet e cenueshme. Për më tepër, çmimi i karbonit mund të zvogëlojë emetimet dhe të gjenerojë deri në 730 milionë euro në vit për investime thelbësore për zbutjen dhe përshtatjen, sipas Grupit të Bankës Botërore.
“Të ardhurat nga çmimi i karbonit mund të mbështesin familjet dhe bizneset gjatë tranzicionit të gjelbër dhe do të ofronin përfitime të tjera të përbashkëta, si përmirësimi i cilësisë së ajrit dhe shëndetit në Maqedoninë e Veriut,” tha Sanja Madzarevic-Sujster, ekonomiste e lartë në Bankën Botërore dhe autorja kryesore e raportit. /Përgatiti: ekofin.al
