Tregtia për bizneset agroushqimore mes vendeve të Ballkanit Perëndimor duket se po lehtësohet dhe kjo fal nismës “Ballkan i Hapur”. Marrëveshja mes Shqipërisë, Maqedonisë së veriut dhe Serbisë, lidhur dhjetorin e vitit të kaluar në Tiranë për njohjen e çertifikatave, analizave laboratorike dhe lehtësimin e mëtejshëm të biznesit agroushqimor mes vendeve të Ballkanit të Hapur ka sjellë përfitime të ndërsjellta. Ministrja e Bujqësisë dhe Zhvillimit Rural, znj. Frida Krifca, përmes rrjeteve sociale ka bërë me dije se:
“Kjo marrëveshje po tregon çdo ditë përfitime të ndërsjellta ekonomike dhe njerëzore mes tre vendeve ku në 4 muajt e parë të vitit 2022, është rritur qarkullimi dhe volumi tregtar me 51% duke arritur në mbi 57 milionë euro nga 37.8 milionë euro që ishte në katër mujorin e parë të 2021”.
Sipas saj, Shqipëria ka 31% rritje të eksporteve bujqësore me Maqedoninë e Veriut dhe 198% rritje të eksporteve me Serbinë për këtë periudhë krahasimore.
