Komisioni Evropian prezantoi këtë javë një paketë të re për thjeshtimin e rregullave tatimore, e cila pritet t’u kursejë bizneseve në Bashkimin Evropian rreth 8 miliardë euro në vit, përfshirë 3.3 miliardë euro nga ulja e kostove administrative.
Dy projektligjet e propozuara synojnë të reduktojnë burokracinë dhe ta bëjnë Evropën një vend më tërheqës për investime dhe zhvillimin e biznesit.
Sipas Komisionit Evropian, heqja e procedurave paraprake dhe thjeshtimi i procesit të rimbursimeve do ta bëjnë më të lehtë financimin e kompanive, do të nxisin investimet dhe do të rrisin konkurrueshmërinë.
Masa kryesore e paketës parashikon heqjen e tatimit në burim për të gjitha pagesat ndërkufitare të dividendëve, interesave dhe honorareve (royalties) mes kompanive të BE-së. Vetëm kjo masë pritet t’u sjellë tatimpaguesve evropianë kursime dhe përfitime prej rreth 5.3 miliardë eurosh në vit.
Paketa parashikon gjithashtu vendosjen e një standardi minimal të përbashkët për trajtimin tatimor të investimeve në kërkim dhe zhvillim (R&D), me synimin për ta bërë Evropën më tërheqëse për investitorët. Komisioni vlerëson se kjo mund të rrisë Prodhimin e Brendshëm Bruto të BE-së me rreth 0.2% në vit.
Reforma është pjesë e përpjekjeve të Bashkimit Evropian për të forcuar konkurrueshmërinë ekonomike, një nga prioritetet kryesore të presidentes së Komisionit Evropian, Ursula von der Leyen.
Në fillim të mandatit aktual, Komisioni u angazhua që deri në vitin 2029 të ulë barrën administrative për bizneset me 25%, ndërsa për ndërmarrjet e vogla dhe të mesme (SME) me të paktën 35%. Sipas vlerësimeve, kjo do të përkthehej në të paktën 37.5 miliardë euro kursime në vit deri në fund të dekadës.
Organizata BusinessEurope, që përfaqëson 42 federata kombëtare të biznesit në Evropë, mirëpriti propozimet. Drejtori i përgjithshëm Markus J. Beyrer vlerësoi veçanërisht heqjen e tatimit në burim, reduktimin e kontrolleve të dyfishta të pajtueshmërisë për kompanitë që tashmë mbulohen nga tatimi minimal global, si edhe përjashtimet që lehtësojnë kompanitë më të vogla nga rregullat e hartuara për korporatat shumëkombëshe.
Paketa do t’i nënshtrohet tani negociatave në Parlamentin Evropian dhe në Këshillin e Bashkimit Evropian. Pasi të dy bashkëligjvënësit të miratojnë pozicionet e tyre, do të nisin negociatat ndërinstitucionale për arritjen e një teksti përfundimtar.
