Politikanët në Barcelonë mbështesin rritjen e taksës turistike për pasagjerët e kroçerave, si pjesë e përpjekjeve për të frenuar mbingarkesën turistike.
Propozimi është dakordësuar nga partitë në Këshillin Bashkiak të Barcelonës, por Parlamenti i Katalonjës duhet ende ta miratojë përpara se ndryshimi të bëhet ligj.
Nëse miratohet, tarifa do të rritet gati trefish, duke shkuar në 30 euro në ditë. Aktualisht, pasagjerët e kroçerave paguajnë 11 euro nëse qëndrojnë më pak se 12 orë në qytet, shumë që përbëhet nga një shtesë bashkiake prej 5 eurosh dhe një taksë rajonale prej 6 eurosh.
Tarifa më e lartë synon të frenojë turizmin afatshkurtër të kroçerave
Tarifa e rritur do të zbatohej vetëm për kroçerat që bëjnë ndalesa në port dhe qëndrojnë të ankoruara më pak se 12 orë. Kritikët argumentojnë se këta vizitorë sjellin pak përfitime për ekonominë lokale, krahasuar me shqetësimet dhe mbingarkesën që shkaktojnë.
“Provat që WTTC ka mbledhur nga destinacione të tjera tregojnë se rritjet e papritura të taksave rrallë japin rezultatet e synuara. Kostot shtesë për vizitorët në Barcelonë ka të ngjarë të ulin kontributin e përgjithshëm ekonomik të gjeneruar nga industria e kroçerave, pasi turistët do të përshtatin mënyrën se si shpenzojnë në qytet.”
Ajo shtoi se Barcelona është një nga portet kryesore në botë për nisjen dhe mbërritjen e kroçerave, duke pritur rreth 4 milionë pasagjerë çdo vit dhe duke gjeneruar mesatarisht rreth 255 euro shpenzime lokale për çdo pasagjer që e ka Barcelonën si port nisjeje ose mbërritjeje, një nga nivelet më të larta globalisht.
“Ndikimi më i gjerë i masave të tilla mund të jetë veçanërisht i rëndësishëm, jo vetëm sa i përket kërkesës së vizitorëve, por edhe kontributit fiskal që mbështet ekonomitë lokale dhe rajonale. Vetëm industria e kroçerave kontribuoi me 11.9 milionë euro taksa për Këshillin Bashkiak të Barcelonës në vitin 2024,” tha ajo./Përshtati nga Euronews, ekofin.al
