Ministrja e Ekonomisë dhe Inovacionit, Delina Ibrahimaj, bëri të ditur sot se Këshilli i Ministrave miratoi vendimin për indeksimin e pensioneve me 2,7%, i cili do të hyjë në fuqi nga 1 korriku 2026.
Në daljen për gazetarët, pas mbledhjes së Qeverisë, ministrja Ibrahimaj tha ky vendim rikthen skemën e zakonshme të indeksimit të pensioneve.
“Sot miratuam vendimin për indeksimin e pensioneve për vitin 2026. Është një vendim që e rikthen procesin në shtratin normal që ka pasur”, u shpreh ministrja.
Ibrahimaj kujtoi se gjatë vitit 2022, për shkak të krizës energjetike, pensionet u indeksuan dy herë, në muajt prill dhe tetor.
“Që prej këtij viti, nga data 1 korrik 2026, do të indeksojmë pensionet me 2,7%. Ky indeksim përfshin të gjitha pensionet e pleqërisë, pensionet e veçanta, si edhe përfitimet e barrëlindjes”, tha Ibrahimaj.
Sipas Ibrahimajt, nga kjo masë do të përfitojnë rreth 900 mijë qytetarë, të cilët do ta kenë të reflektuar indeksimin prej 2,7% në pagesat që do të marrin duke nisur nga 1 korriku 2026.
