Transferimi i parave mes llogarive bankare në Kosovë do të mund të realizohet brenda pak sekondave, pa kufizime në orar apo ditë të javës, falë sistemit të ri të pagesave të shpejta, i cili u prezantua të premten nga Banka Qendrore e Kosovës (BQK).
Sipas BQK-së, sistemi do të nisë funksionimin më 23 nëntor, fillimisht në katër banka komerciale, të cilat kanë kryer përgatitjet e nevojshme, ndërsa nga shkurti i vitit të ardhshëm parashihet të jetë i disponueshëm në të gjitha bankat që operojnë në Kosovë.
Guvernatori i BQK-së, Ahmet Ismaili, theksoi se sistemi i ri i pagesave është një investim strategjik në infrastrukturën financiare të Kosovës, që lehtëson pagesat dhe krijon mundësi për zhvillimin e shërbimeve të reja për qytetarët dhe bizneset.
Në ceremoninë e prezantimit mori pjesë edhe kryeministri i Kosovës, Albin Kurti, i cili e vlerësoi këtë zhvillim si një hap drejt modernizimit të sistemit financiar dhe përafrimit të tij me standardet evropiane, derisa e ndërlidhi funksionalizimin e TIPS-K edhe me përpjekjet e Kosovës për integrim në sistemin evropian të pagesave, veçanërisht me synimin për anëtarësim në Zonën e Vetme të Pagesave në Euro (SEPA).
TIPS-K (TIPS Clone Kosovo) është sistemi i ri i pagesave të shpejta në Kosovë, i zhvilluar sipas modelit evropian TIPS (TARGET Instant Payment Settlement)./AlbanianPost
