Bordi i Transparencës ka miratuar çmimet e reja të tregtimit të karburanteve në vend, të cilat do të hyjnë në fuqi sot, më 19 nëntor 2026, në orën 14:00.
Sipas vendimit të fundit, çmimi maksimal i naftës do të jetë 201 lekë për litër, ndërsa benzina do të tregtohet me jo më shumë se 160 lekë për litër. Ndërkohë, çmimi i gazit për automjetet është përcaktuar në 71 lekë për litër.
Konkretisht, çmimet e reja të miratuara nga Bordi janë Nafta: 201 lekë/litër me pakicë dhe 189 lekë/litër me shumicë; Benzina: 160 lekë/litër me pakicë dhe 148 lekë/litër me shumicë; Gazi për automjete: 71 lekë/litër me pakicë dhe 59 lekë/litër me shumicë; Nafta për peshkimin: 105 lekë/litër.
Çmimet e përcaktuara do të mbeten në fuqi deri në mbledhjen e ardhshme të Bordit të Transparencës, kur do të shqyrtohen ndryshimet e mundshme në tregun e hidrokarbureve.
Ministria e Ekonomisë dhe Inovacionit ka paralajmëruar të gjithë operatorët e tregtimit me shumicë dhe pakicë se zbatimi i çmimeve të miratuara është i detyrueshëm.
Në rast të konstatimit të shkeljeve, ndaj operatorëve do të zbatohet masa e pezullimit të aktivitetit.
Bordi i Transparencës vijon të përcaktojë çmimet tavan të karburanteve në kuadër të situatës së veçantë të shpallur në tregun e hidrokarbureve, me qëllim mbrojtjen e konsumatorëve dhe garantimin e konkurrencës së ndershme.
