Qeveria spanjolle po ndërmerr masa të ashpra ndaj pronave të listuara në Airbnb, si pjesë e përpjekjeve për të zbutur krizën e banesave në vend — një veprim që kompania e konsideron si të gabuar.
Një gjykatë spanjolle hodhi poshtë dje një ankesë nga Airbnb, duke lënë në fuqi një urdhër për bllokimin e afro 66,000 listimeve me qira që, sipas qeverisë, kanë shkelur rregullat lokale.
Qeveria argumenton se qiratë afatshkurtra përmes platformës në qendrat urbane dhe destinacionet turistike po përkeqësojnë mungesën e banesave në një kohë kur vendi po përjeton një rritje rekord të vizitorëve.
Muajin e kaluar, qeveria spanjolle urdhëroi Airbnb të bllokojë 65,935 listime, pas një sinjalizimi nga Ministria e të Drejtave të Konsumatorit për shkelje të ligjeve në fuqi. Nga këto, 5,800 u urdhëruan të hiqeshin menjëherë.
Sipas ministrisë, listimet e sinjalizuara nuk përmbanin numrin e licencës ose nuk tregonin nëse pronari ishte individ apo kompani. Disa prej tyre, sipas autoriteteve, përmbanin numra që nuk përputheshin me të dhënat zyrtare.
Airbnb mbron pozicionin e saj
Në një deklaratë, Airbnb u shpreh se veprimet e ministrisë bien ndesh me rregullat spanjolle, të cilat përcaktojnë se përgjegjës për informacionin e listuar janë pronarët, dhe jo vetë platforma.
Kompania theksoi gjithashtu se vendimi i gjykatës së Madridit nuk ishte marrë mbi bazën e meritës së urdhrit të ministrisë, dhe se vendimi përfundimtar do të kërkojë më shumë kohë.
Airbnb shtoi se kriza e banesave në Spanjë vjen nga “mungesa e ofertës për të përmbushur kërkesën”, dhe çdo justifikim tjetër “është një shpërqendrim”.
Muajin e kaluar, Ministri i të Drejtave të Konsumatorit, Pablo Bustinduy, deklaroi për Associated Press se sektori i turizmit nuk mund të “rrezikojë të drejtat kushtetuese të popullit spanjoll”, përfshirë të drejtën për banesë dhe mirëqenie.
Ndërkohë, ministri i Ekonomisë Carlos Cuerpo, në një intervistë të veçantë, tha se qeveria duhet të adresojë efektet e padëshiruara të turizmit masiv, duke theksuar nevojën për ndërtimin e më shumë banesave dhe rregullimin e qirave afatshkurtra turistike./Përshtati nga Euronews, ekofin.al
