Periudha e kujdesit ndaj personave me aftësi të kufizuara dhe personave të verbër do t’u njihet ndihmësve personalë si periudhë sigurimi për pensionin e pleqërisë dhe përfitimin e barrëlindjes. Masa do të zbatohet për personat që nuk janë ekonomikisht aktivë dhe nuk sigurojnë të ardhura nga skema e detyrueshme e sigurimeve shoqërore, ndërsa efektet e saj nisin nga 1 tetori 2026.
Vendimi i miratuar nga Këshilli i Ministrave zgjeron skemën e mbrojtjes së veçantë që prej vitit 2022 zbatohej për gratë e papuna me tre ose më shumë fëmijë deri në moshën 18 vjeç. Në këtë skemë përfshihen tashmë edhe ndihmësit personalë të personave me aftësi të kufizuara dhe të përfituesve të statusit të të verbrit.
Përfitimi nuk do të jetë automatik për çdo person që ofron kujdes. Vendimi përcakton se periudha do të njihet si periudhë sigurimi vetëm kur ndihmësi personal nuk është ekonomikisht aktiv dhe nuk përfiton të ardhura nga sigurimet shoqërore të detyrueshme.
Në praktikë, njohja e kësaj periudhe u mundëson ndihmësve personalë që vitet e kaluara në kujdes të mos mbeten jashtë historikut të sigurimeve. Kontributet e paguara do të merren parasysh për plotësimin e kushteve të pensionit të pleqërisë dhe për përfitimin e barrëlindjes.
Për administrimin e skemës do të ngarkohen bashkitë. Njësitë vendore duhet të përcaktojnë listat e ndihmësve personalë dhe, çdo muaj, të llogarisin dhe të kryejnë pagesën e kontributeve të sigurimeve shoqërore dhe shëndetësore.
Kostoja financiare do të përballohet nga buxheti i Ministrisë së Shëndetësisë dhe Mirëqenies Sociale.
