Muaji nëntor rezulton të ketë qenë pozitiv për turizmin dhe këtë e dëshmojnë edhe të dhënat e publikuara këtë të hënë nga INSTAT për strukturat akomoduese. Referuar këtyre të dhënave, numri i vizitorëve ka shënuar një rritje prej 30,8% në krahasim me të njëjtën periudhë të vitit të kaluar. Rritja më e madhe është regjistruar tek vizitorët jo-rezident, pra turistët e huaj, të cilët kanë kontribuar me një rritje prej 52,1%, ndërsa vizitorët rezident janë rritur me 2,8%.
Rritja ka qenë e dukshme në rajonet dhe zonat jashtë bregdetit, ashtu siç pritej, me Rajonin Qendër që ka tërhequr 54,8% të vizitorëve, dhe Zonat Jo-bregdetare që kanë përbërë 65,3% të vizitorëve, duke dëshmuar një diversifikim të destinacioneve. Ndërkohë, hotelet dhe akomodimet e ngjashme kanë mbajtur dominimin me 94,8% të vizitorëve, duke dëshmuar preferencën për këtë lloj akomodimi.
Po ashtu, numri i netqëndrimeve gjithsej ka pësuar një rritje prej 35,8% krahasuar me Nëntorin 2023. Vizitorët jo-rezident kanë shënuar gjithashtu rritje të ndjeshme në netët e qëndrimeve, me një rritje prej 50,5% në hotele dhe akomodime të ngjashme. Rritja ka qenë sërish më e lartë në Rajonin Qendër, që përbën 56,7% të netëve të qëndrimeve, si dhe në Zonat Jobregdetare që kanë kontribuar me 63,7% të netëve.
Të dhënat e INSTAT tregojnë gjithashtu një rritje të normës së shfrytëzimit të kapaciteteve akomoduese, ku kjo normë për hotelet ka arritur në 19,5%, 12,7% që ishte një vit më parë. Po ashtu, norma e shfrytëzimit të shtretërve ka arritur 19,8%, krahasuar me 16,2% që ishte në Nëntor 2023. /ekofin.al
