Operatori i Sistemit të Transmetimit (OST) ka paraqitur një kërkesë të re për rritjen e tarifës së transmetimit të energjisë elektrike, e cila do të ndikojë drejtpërdrejt në çmimin që paguajnë konsumatorët. Në aplikimin e dorëzuar pranë Entit Rregullator të Energjisë (ERE), OST kërkon një rritje prej 45%, duke e çuar tarifën nga 0.85 lekë/kWh në 1.22 lekë/kWh.
Rritja e kërkuar vjen si pasojë e kostove të larta për blerjen e energjisë, një faktor kyç që ndikon në të ardhurat e OST. Kjo do të prekë veçanërisht bizneset që operojnë në tregun e liberalizuar të energjisë, duke rritur kostot e tyre operative.
Vendimi përfundimtar për këtë rritje do të merret nga ERE, e cila ka nisur shqyrtimin e kërkesës. Nëse kjo rritje miratohet, ajo do të reflektohet në tarifat e reja që do të aplikohen për konsumatorët.
