Turizmi vijon të mbetet një nga shtyllat kryesore të rritjes ekonomike. Kushtet e favorshme klimatike, historia e pasur, bukuritë natyrore, mikpritja dhe ushqimi i mirë, janë në qendër të jehonës që mediat e huaja prestigjoze i kanë bërë vazhdimisht vendit në dy vitet e fundit. Vetëm gjatë periudhës janar – gusht 2024, vendi u vizitua nga 8.5 milionë të huaj, shifër që tejkalon 4-fish numrin të popullsisë.
Sipas të dhënave të INSTAT, numri i vizitorëve në korrik të këtij viti është rritur me 35.9 % në krahasim me korrikun e 2023, ku rritjen më të madhe e ka numri i vizitorëve jorezidentë me 53.1%.
Rajoni qendër, duke përfshirë Tiranën, Durrësin dhe qytetet më të afërta ka pasur edhe përqendrimin më të madh të akomodimit me një rritje prej 74.1%. Kjo tendencë është pjesërisht prej faktit se kryeqytetet janë ndër më të vizituarit në botë, por edhe për shkak të distancës së afërt me aeroportin ndërkombëtar. Rajoni qendër shënon një stacion të afërt akomodimi jo vetëm për turistët disa ditorë, por edhe për ata që blejnë një paketë turistike ballkanike, me një natë qëndrimi në Shqipëri.
Vendi ofron mundësi të shumta eksplorimi dhe përfshirje në aktivitete të ndryshme kulturore dhe artistike, gjë që ndikon në shtimin e netëve të qendrimit, të cilat janë rritur me 21.3% në rastin e vizitorëve jorezidentë dhe 6.2% të rezidentëve. Në muajin korrik 2024 zona bregdetare ka njohur rritjen më të madhe të netëve të qëndrimit me 81.9% krahasuar me vitin e kaluar. Plazhet e kristalta, eksplorimet me anije nëpër gjiret e shumta të rivierës, aktivitetet kulturore, vizitat në kala dhe ecjet në parqet kombëtare të jugut, janë disa nga atraksionet që i ftojnë vizitorët të qëndrojnë më gjatë. Për këtë arsye hotelet dhe akomodime të ngjashme janë strukturat me net qëndrimi më të lartë, rreth 92.4%.
Po kështu gjatë korrikut 2024, norma e shfrytëzimit të dhomave të “Hoteleve dhe akomodimeve të ngjashme” është 49,3 %, kundrejt 44,8 % ndërsa ajo e shtretërve është 55,4 %, kundrejt 49,5 % që ishte në muajin Korrik 2023.
Natyrshëm kjo rrit nevojën për shtimin e kapaciteve akomoduese dhe investimeve në gjithë Shqipërinë dhe veçanërisht përgatitjen profesionale të burimeve njerëzore për një shërbim më të mirë në sezonet e ardhshme turistike.
