Zhvillimi i turizmit dhe sidomos atij të aventurës, ka lindur nevojën për realizimin e më shumë investimeve në këtë drejtim. Për këtë qëllim, Fondi Shqiptar i Zhvillimit ka shpallur tenderin për “Ndërhyrje në infrastrukturën turistike të aventurës, Zip line, ura të varura, Via ferrata, parqe aventure, etj”.
Fondi limit i kontratës është 168,312,312.98 Lekë pa TVSH nga Programi GOA për periudhën buxhetore 2025-2027. Afati për realizimin e këtyre investimeve, siç është parashikuar në kontratë është 18 muaj.
Sipas dokumenteve të tenderit do të ndërtohen disa ZipLine në Liqenin e Funarit, në Belsh, në Divjakë, në Valbonë, Roshnik e Voskopojë dhe Dumre.
Liqenet janë nga destinacionet natyrore më të bukura të Shqipërisë, të pasura me biodiversitet dhe një peizazhe të mrekullueshëm.
Zona rreth tyre ofrojnë mundësi të shumta për aktivitete natyrore dhe rekreative, duke përfshirë ecje, vëzhgim shpendësh, peshkim dhe eksplorim të kulturave lokale.
Potenciali për zhvillimin e turizmit ekologjik dhe qëndrueshmërinë e këtij ekosistemi është i madh, duke ofruar mundësi për zhvillimin ekonomik të zonave dhe për ruajtjen e natyrës për brezat e ardhshëm.
Ndërkohë planifikohen Via Ferrata në Fshatin Kuç në Vlorë 160m dhe në kanionin e Gjirit të Gjipesë 350m.
Këto lloj aktivitetesh do të tërheqin edhe më shumë turistët aventurierë në zonën e Jugut dhe do të kenë një ndikimin në turizëm dhe në zgjatjen e netqëndrimeve. Pritet që këto zhvillime të kenë gjithashtu ndikim pozitiv në jetën dhe ekonominë lokale.
Sipas dokumenteve të tenderit, projekti në tërësi në terma mjedisore dhe sociale konsiderohet projekt me impakte negative minimale dhe të përkohshme. /ekofin.al
